ગુજરાતમાં મતદારોની લાગણીઓનો ફરીથી વેપાર શરૂ થઈ ગયો

કોરોના મહામારીની ભયાવહ પરિસ્થિતિ વચ્ચે લોકડાઉન પુરૂ થયુ છે, અને રાજ્યસભાની ચૂંટણીઓ જાહેર થયાના 72 કલાકમાં ગુજરાતમાં મતદારોની લાગણીઓનો ફરીથી વેપાર શરૂ થઈ ગયો છે. કરજણથી અક્ષય પટેલ અને કપરાડાથી જીતુ ચૌધરી એમ કોંગ્રેસના વધુ બે ધારાસભ્યોએ બુધવારે રાજીનામું આપી દીધું હતું. જેની સ્પષ્ટતા વિધાનસભા અધ્યક્ષ રાજેન્દ્ર ત્રિવેદીએ કરી હતી. હવે આ સિલસિલામાં આજે કપરાડાના પૂર્વ ધારાસભ્ય જીતું ચૌધરીની કોંગ્રેસ પર આકરી પ્રતિક્રિયા સામે આવી છે.

- Advertisement -

પાર્ટીમાં રહીને કિશન પટેલે પાર્ટી વિરુદ્ધ કામ કર્યુ

આજે કપરાડાના પૂર્વ ધારાસભ્ય જીતું ચૌધરીએ પોતાની પ્રતિક્રિયા આપીને કોંગ્રેસ પર મોટા આક્ષેપો કર્યા હતા. રાજીનામું આપ્યા બાદ જીતુ ચૌધરીએ આજે પહેલી વખત કેમેરાની સામે પ્રતિક્રિયા આપતા કોંગ્રેસ નેતા કિશન પટેલ પર ગંભીરમાં ગંભીર આરોપ લગાવ્યા હતા. તેમણે જણાવ્યું કે, પાર્ટીમાં રહીને કિશન પટેલે પાર્ટી વિરુદ્ધ કામ કર્યુ છે, જેની મે અવાર નવાર કોંગ્રેસમાં અને હાઈકમાનને જાણ કરી હતી. પરંતુ તેમણે મારી વાતને અવગણી હતી.

કિશન પટેલ વિરુદ્ધ પક્ષમાં ફરિયાદ

એટલું જ નહીં, તેમણે કિશન પટેલ વિરુદ્ધ એક મોટો આરોપ લગાવ્યો હતો, તેમણે ખુલાસો કરતા જણાવ્યું કે, લોકસભાની ચૂંટણી વખતે પણ કિશન પટેલે પાર્ટીને હરાવવા માટે અનેક પ્રયત્નો કર્યા હતા. આ તમામ વાતોની મને જાણ હતી. જેને લઈને મેં કિશન પટેલ વિરુદ્ધ પક્ષમાં ફરિયાદ કરી હતી. પરંતુ મારું કોઈ સાંભળતું નહોતું. આ વાતને 1 વર્ષ થયું છતાં કોઈ કામ આગળ ન થયું અને આખરે મારે રાજીનામું આપવું પડ્યું હતું.

ત્રીજા ઉમેદવાર તરીકે નરહરિ અમિનને ઉતાર્યા

અત્રે નોંધનીય છે કે, અંદરખાને ક્યારથીએ ચાલી રહેલી સોદાબાજીનો બીજો અંક ગુરૂવારે ખુલ્લો પડતા 19મી જૂને રાજ્યસભા ચૂંટણી જીતવા ભાજપના ત્રીજા ઉમેદવારના રસ્તો સાફ હોવાની સ્પષ્ટ ડિઝાઈને આકાર લીધો છે. માર્ચ મહિનામાં પુરતુ સંખ્યાબળ ન હોવા છતાંયે ત્રીજા ઉમેદવાર તરીકે નરહરિ અમિનને ઉતાર્યા તે દિવસથી જ ઓગસ્ટ 2017ની જેમ ભાજપ યેનકેન પ્રકારે કોંગ્રેસના ધારાસભ્યોના રાજીનામા અપાવીને જીત મેળવીને જ ઝંપશે એ સ્પષ્ટ થઈ ચૂક્યુ હતુ. માર્ચમાં એક પછી એક એમ કોંગ્રેસના પાંચ ધારાસભ્યોએ અત્યંત નાટકિય ઢબે રાજીનામા આપીને કોંગ્રેસમા નથી ફાવતુ એવો રાગ આલાપ્યો હતો.

આ પણ વાંચો:-  સુરતના લિબાયત વિસ્તારની 587 દુકાનો ક્લસ્ટર ઝોનમાં

ગુરુવારે 77 દિવસ પછી રાજીનામું આપનારા અક્ષય પટેલ અને જીતુ ચૌધરી ગાયબ થઈ ગયા હતા. કોંગ્રેસમાંથી વધુ બે-ત્રણ ધારાસભ્યો રાજીનામું આપી અથવા ક્રોંસવોટિંગ કરશે તેવી અફવાહો ચાલી રહી છે. જે સાચી છે કે ખોટી એ 19મી જુને નૈતિકતાના પારખારૂપે આપોઆપ સ્પષ્ટ થઈ જશે.

લેટેસ્ટ ન્યૂઝથી અપડેટ રહેવા માટે ક્લિક કરીને જોડાઓ ન્યૂઝ ફોર ગુજરાતી સાથે.

તમે અમને ફેસબુક, ટ્વીટર, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

સૌજન્ય:સંદેશ