Gujarati News, News in Gujarati – ગુજરાત સમાચાર | દિવ્ય ભાસ્કર - Divya Bhaskar

– વનવિભાગની મંજૂરી માટે સરકારે ભોપાલ ફાઈલ મોકલતા ત્યાંથી ક્વેરી કાઢતા કોર્પોરેશને તેની પૂર્તતા કરી. 

- Advertisement -

વડોદરા મ્યુનિસિપલ કોર્પોરેશન દ્વારા શહેરના પશ્ચિમ અને દક્ષિણ વિસ્તારને પાણી પૂરૂ પાડવા માટે અમૃત યોજના હેઠળ આશરે રૂ. 166 કરોડના ખર્ચે મહી નદી નજીક સિંધરોટ ખાતેથી પાણી લાવવાની યોજના બનાવી છે. આ યોજના ચાલુ વર્ષના અંત સુધીમાં પૂરી કરી દેવા વિચાર્યું છે. મહી નદી નજીક સિંધરોટ ખાતે ઇન્ટેક વેલ બનાવીને ત્યાંથી આશરે 100 એમએલડી પાણી 19 કિલોમીટર લાંબી પાઈપલાઈન દ્વારા વડોદરા શહેર સુધી લેવાશે.

જો કે ભવિષ્યની પાણીની જરૂરિયાતને ધ્યાનમાં રાખીને 150 એમએલડી કેપેસિટીનો વોટર ટ્રીટમેન્ટ પ્લાન્ટ બનાવવામાં આવી રહ્યો છે. પાઈપ લાઈન નાખવા માટેનો અમુક વિસ્તાર વન વિભાગની રીઝર્વ જમીનમાંથી પસાર થાય છે. ગુજરાત સરકારે આ માટે કેન્દ્ર સરકારના વન વિભાગની મુખ્ય ઓફિસ ભોપાલને ફાઈલ મંજૂરી માટે મોકલી આપી છે, જ્યાંથી થોડી પુછતાછ કરવામાં આવતા વડોદરા કોર્પોરેશન દ્વારા તેની પૂર્તતા કરી દેવામાં આવી છે. 

કોર્પોરેશનની સ્ટેન્ડિંગ કમિટીના ચેરમેને પણ બજેટ રજૂ કરતી વખતે કહ્યું હતું કે, આ વર્ષે જો આ પાણી શહેરને મળી જાય તો દક્ષિણ વિસ્તારને આજવાનું  પાણી આપવાનું થાય છે તે બંધ થાય જેના પરિણામે દક્ષિણ વિસ્તારને અપાતો પાણીનો જથ્થો પૂર્વ વિસ્તારને આપી શકાય અને ત્યાં પાણીનો પ્રશ્ન હળવો બની શકે. 

બે દિવસ અગાઉ મ્યુનિસિપલ કમિશનર પાણી પુરવઠા વિભાગના અધિકારીઓ વગેરે સિંધરોટ ગયા હતા અને સમગ્ર પ્રોજેક્ટની સમીક્ષા કરી હતી. હાલ ભીમપુરાથી રાઇપુરા વચ્ચેની જમીન રિઝર્વ ફોરેસ્ટ હોવાથી સાડા ત્રણ કિલોમીટરની કામગીરી બાકી છે. આ મંજૂરી ઝડપથી મળે તે માટે કોર્પોરેશન દ્વારા પ્રયાસો હાથ ધરવામાં આવ્યા છે.

આ પણ વાંચો:-  સુભાનપુરા વિસ્તારમાં CGST ભવનનો કર્મચારી કોરોના પોઝિટિવ આવ્યો
- Advertisement -

LEAVE A REPLY