‘સિક્સર કિંગ’ રોહિત શર્માએ IPLમાં રચ્યો ઈતિહાસ, આવું કરનાર પ્રથમ ભારતીય બેટ્સમેન બન્યો

નવી દિલ્હી

IPL 2023ની 31મી મેચમાં ભલે મુંબઈ ઈન્ડિયન્સને પંજાબ કિંગ્સના હાથે હારનો સામનો કરવો પડ્યો હોય, પરંતુ ટીમના કેપ્ટન રોહિત શર્માએ આ મેચમાં ઈતિહાસ રચી દીધો છે. PBKS સામે, હિટમેને 27 બોલમાં 4 ચોગ્ગા અને 3 આકાશી છગ્ગા ફટકારીને 44 રનની શાનદાર ઇનિંગ રમી હતી. આ ત્રણ છગ્ગા સાથે રોહિત શર્માએ આઈપીએલમાં 250 છગ્ગા પૂરા કર્યા અને આ માઈલસ્ટોન સુધી પહોંચનાર પ્રથમ ભારતીય બન્યો. હા, રોહિત શર્મા પહેલા માત્ર બે બેટ્સમેનોએ IPLમાં 250 સિક્સરનો આંકડો સ્પર્શ કર્યો હતો અને તે બંને ભારતીય નહોતા.

આઈપીએલના ઈતિહાસમાં સૌથી વધુ સિક્સર મારવાનો રેકોર્ડ યુનિવર્સ બોસ ક્રિસ ગેલના નામે છે. વેસ્ટ ઈન્ડિઝના આ ધમાકેદાર ઓપનરે ઈન્ડિયન પ્રીમિયર લીગમાં રમેલી 141 ઈનિંગ્સમાં સૌથી વધુ 347 સિક્સર ફટકારી હતી. બીજી તરફ 251 સિક્સર ફટકારવાનો રેકોર્ડ એબી ડી વિલિયર્સના નામે છે. આ બંને બેટ્સમેન હવે IPL નથી રમે, તેથી રોહિત પાસે IPLમાં સિક્સર કિંગ બનવાની શાનદાર તક છે.

ભારતીય ખેલાડીઓની વાત કરીએ તો રોહિત શર્મા હવે 250 સિક્સર સાથે ટોપ પર છે. તેની પાછળ ચેન્નાઈ સુપર કિંગ્સના કેપ્ટન મહેન્દ્ર સિંહ ધોની બીજા અને રોયલ ચેલેન્જર્સ બેંગ્લોરના સ્ટાર બેટ્સમેન વિરાટ કોહલી ત્રીજા સ્થાને છે.

IPLના ઈતિહાસમાં સૌથી વધુ સિક્સર મારનાર ખેલાડીઓ-

ક્રિસ ગેલ – 357
એબી ડી વિલિયર્સ – 251
રોહિત શર્મા – 250*
એમએસ ધોની – 235
વિરાટ કોહલી – 229

કેવી રહી હતી મુંબઈ ઈન્ડિયન્સ વિ પંજાબ કિંગ્સ મેચ?

MIના કેપ્ટન રોહિત શર્માએ આ મેચમાં ટોસ જીતીને પ્રથમ બોલિંગ કરવાનો નિર્ણય લીધો હતો. પ્રથમ 10 ઓવરમાં, જ્યારે પંજાબે 4 વિકેટ ગુમાવી દીધી હતી, ત્યાં સુધી એવું લાગતું હતું કે રોહિત શર્માનો નિર્ણય સાચો હતો, પરંતુ તે પછી જ્યારે કેપ્ટન સેમ કુરેને હરપ્રીત સિંહ અને અન્ય ખેલાડીઓ સાથે રન રેટ વધાર્યો તો મુંબઈની મુશ્કેલીઓ વધી ગઈ. સેમ કુરેને 55 રનની શાનદાર ઇનિંગ રમીને ટીમને 214ના સ્કોર સુધી પહોંચાડી હતી. આ સ્કોરનો પીછો કરતા મુંબઈ ઈન્ડિયન્સ તરફથી કેમરન ગ્રીન (67) અને સૂર્યકુમાર યાદવે (57) અડધી સદી ફટકારી હતી, પરંતુ બંને બેટ્સમેન ટીમને જીત અપાવી શક્યા ન હતા. આ સિઝનમાં MIની આ ત્રીજી હાર છે.