Gujarati News, <a href="https://news4gujarati.com/tag/news-in-gujarati/" class="st_tag internal_tag" rel="tag" title="Posts tagged with News in Gujarati">News in Gujarati</a> – ગુજરાત સમાચાર | દિવ્ય ભાસ્કર - Divya Bhaskar
  • સ્વચ્છતા માટે ચેરિટી કમિશનરે મ્યુનિ.ને તાકીદ કરી
  • ચેરિટી કમિશનરે પરિપત્રમાં લખ્યું કે, મંદિરો બહાર વાહન પાર્ક કરવાની કોઈ વ્યવસ્થા નથી છતાં કોર્પોરેશન કોઈ કાર્યવાહી કરતું નથી

સુપ્રીમ કોર્ટના જજની ભદ્રકાળી મંદિરમાં વિઝિટ દરમ્યાન આંખે જોયેલી સ્થિતિ સામે ભારે નારાજગી દર્શાવી છે. મંદિરમાં પ્રવેશતા તેમને પ્લાસ્ટિકની થેલીમાં ફૂલ અને પ્રસાદ આપતા અને મંદિરમાં ગંદકી મામલે તાત્કાલિક ચેરિટી કમિશનરને મંદિરોમાં સ્વચ્છતા રખાવવા મ્યુનિ.કમિશનરને કડક સૂચના આપવા આદેશ કર્યો છે. ચેરિટી કમિશનરે તાત્કાલિક ધોરણે કડક પગલા લેવા મ્યુનિસિપલ કમિશનરને પરિપત્ર કર્યો છે.
ચેરિટી કમિશનરે મ્યુનિ. કમિશનરને ઉદ્દેશીને બહાર પાડેલા પરિપત્રમાં ઠેરવ્યું છે કે લોકોની આસ્થા સાથે જોડાયેલા મંદિરોમાં ગંદકીનું સામ્રાજ્ય જોવા મળે છે અને પ્લાસ્ટિકની બેગ પર પ્રતિબંધ હોવા છતા ખુલ્લેઆમ પ્લાસ્ટિક બેગ મળી રહી છે. ઉપરાંત મંદિરની બહાર વાહનો પાર્ક કરવાની કોઇ વ્યવસ્થા નથી. છતા કોર્પોરેશન કોઇ પગલા લઇ રહ્યું નથી.
મંદિર ટ્રસ્ટીઓ સામે પગલાં લેવાની સૂચના
સુપ્રીમ કોર્ટના જજની મંદિર મુલાકાત બાદ તેઓ ખુબ નારાજ થયા છે તેથી ચેરિટી કમિશનર યશવંત શુકલએ મ્યુનિ. કમિશનરને સૂચના આપી કે તમારા સેનિટેશન ડિપાર્ટમેન્ટને ભદ્રકાળી મંદિરના ટ્રસ્ટી સામે ચલણ આપવા આદેશ કરો.
ગંભીર પરિણામની ચેતવણી પણ અપાઈ
ચેરિટી કમિશનરે પરિપત્રમાં એવું ઠેરવ્યું છે કે આ ગંભીર ઘટના છે.મંદિર પરિસરમાં સ્વચ્છતા નહી જળવાય તો ગંભીર પરિણામો ભોગવવા તૈયાર રહેજો. સ્વામિનારાયણ અને જૈન મંદિરો જેવી સ્વચ્છતા રાખવી જોઇએ.
મંદિરોમાં ગાય-કૂતરાં પણ ઘૂસી જાય છે
મંદિરોમાં પવિત્રતા જળવાતી નથી. જો શહેરના બીજા મંદિરોની તપાસ કરવામાં આવે તો કેટલીક જગ્યાએ ગાય કે કૂતરાં પણ ઘૂસી ગયેલા જોવા મળતાં હોય છે. મંદિરોના ટ્રસ્ટીઓ સામે કોર્પોરેશને કડક પગલા લેવા પડશે.
પ્લાસ્ટિક બેગ પર પ્રતિબંધનો અમલ કરો
પ્લાસ્ટિક પર પ્રતિબંધ છતાં મંદિરમાં પ્લાસ્ટિક બેગમાં ફૂલ-પ્રસાદની પ્રથા પર રોક લગાવવા આદેશ કર્યો છે. સુપ્રીમના જજની મંદિર મુલાકાત દરમ્યાન તેમને પ્લાસ્ટિકની કોથળીમાં ફૂલ-પ્રસાદ આપતા તેમણે તાત્કાલિક રોકનો આદેશ કર્યો છે.
પૂજારીનાં વસ્ત્રો સ્વચ્છ ન હોય તો પણ પગલાં
પરિપત્રમાં એવી રજૂઆત કરાઇ છે કે મંદિરના પૂજારીના વસ્ત્રો સ્વચ્છ નહીં હોય તો લોકોની આસ્થા ટકશે નહીં. સ્વચ્છ વસ્ત્રો પરિધાન નહીં હોય તો મંદિરના ટ્રસ્ટીઓ સામે પગલા લેવા ચેતવણી આપવામાં આવી છે.

આ પણ વાંચો:-  અમદાવાદ : કાલુપુર માર્કેટ ખૂલતા જ પાન-મસાલાના છૂટક વેપારીઓની ભીડ ઉમટી.

- Advertisement -
No tags for this post.
- Advertisement -