અમૃતસરમાં આતંક મચાવવાનું ષડયંત્ર રચવામાં આવી રહ્યું હતું. બુધવારે મોડી રાત્રે શ્રી ગુરુ રામદાસ સરાય પાછળ થયેલા બ્લાસ્ટ પાછળના આરોપીઓની ધરપકડ બાદ આ મોટો ખુલાસો થયો છે. ઈન્ટેલિજન્સ સૂત્રોના જણાવ્યા અનુસાર આરોપીઓ પાસે ઘણા વધુ બોમ્બ હતા. હવે પોલીસ સમગ્ર મામલાની ઉંડાણપૂર્વક તપાસ કરી રહી છે. આરોપીઓની પ્રથમ તસવીરો પણ સામે આવી છે. ધર્મશાળાના સીસીટીવી ફૂટેજમાં બે આરોપીઓ જોવા મળી રહ્યા છે. બ્લાસ્ટ બાદ બંને ધર્મશાળામાં સુઈ ગયા હતા. એસજીપીસી સ્ટાફે બંનેને પકડી લીધા હતા.
પોલીસની પ્રાથમિક તપાસ બાદ પાંચ લોકોની ધરપકડ કરવામાં આવી છે. પંજાબના ડીજીપી ગૌરવ યાદવે પ્રેસ કોન્ફરન્સમાં ગોલ્ડન ટેમ્પલ બ્લાસ્ટ પર પોલીસ કાર્યવાહીની માહિતી આપી છે. ગૌરવ યાદવે કહ્યું કે અમૃતસરમાં ઓછી તીવ્રતાના બ્લાસ્ટના સંબંધમાં 5 લોકોની ધરપકડ કરવામાં આવી છે. આઝાદવીર સિંહ, અમરિક સિંહ, સાહિબ સિંહ, હરજીત સિંહ અને ધર્મેન્દ્ર સિંહની ધરપકડ કરવામાં આવી છે. આઝાદવીર સિંહ અને અમરિક સિંહે IED એસેમ્બલ કર્યું હતું. DGPએ કહ્યું કે SIT મામલાની તપાસ કરશે.
પંજાબ ડીજીપીએ વધુમાં જણાવ્યું કે અમરીક સિંહની પત્નીની પણ પૂછપરછ કરવામાં આવી રહી છે. આઝાદવીર પાસેથી 1.1 કિલો વિસ્ફોટકો મળી આવ્યા છે.