કોંગ્રેસના ભૂતપૂર્વ પ્રમુખ રાહુલ ગાંધી હાલ અમેરિકાના પ્રવાસે છે. જ્યાં તેમણે કેલિફોર્નિયા યુનિવર્સિટીના સિલિકોન વેલી કેમ્પસમાં પ્રવાસી ભારતીયોને સંબોધિત કર્યા હતા. આ દરમિયાન તેમણે વડાપ્રધાન નરેન્દ્ર મોદી પર જોરદાર નિશાન સાધ્યું હતું. જો કે રાહુલ ગાંધી જ્યારે લોકોને સંબોધિત કરી રહ્યા હતા ત્યારે ત્યાં ખાલિસ્તાની ઝંડા લહેરાયા હતા. ખાલિસ્તાની સમર્થકોએ રાહુલ ગાંધીને પણ પડકાર ફેંક્યો હતો.
ખાલિસ્તાનની માંગને લઈને રાહુલ ગાંધીના કાર્યક્રમમાં સૂત્રોચ્ચાર કરવામાં આવ્યા હતા
જ્યારે રાહુલ ગાંધી કેલિફોર્નિયામાં લોકોને સંબોધિત કરી રહ્યા હતા ત્યારે ખાલિસ્તાની સમર્થકોએ ખાલિસ્તાની ઝંડા લહેરાવ્યા હતા અને ખાલિસ્તાનની માગણી કરતા સૂત્રોચ્ચાર કરવામાં આવ્યા હતા. ખાલિસ્તાની સંગઠન SFJએ આની જવાબદારી લીધી છે. સંસ્થાના વડા ગુરપતવંત સિંહ પન્નુએ વીડિયો જાહેર કર્યો અને કહ્યું કે, 1984ના શીખ રમખાણો અંગે અમે શું કર્યું? ખાલિસ્તાનીઓએ રાહુલ ગાંધીને ચેતવણી આપી હતી કે કોંગ્રેસ નેતા અમેરિકામાં જ્યાં પણ જશે ત્યાં ખાલિસ્તાની સમર્થકો ઊભા રહેશે. ખાલિસ્તાનીઓએ વડાપ્રધાન નરેન્દ્ર મોદીને પણ આગામી નિશાન બનાવ્યા અને કહ્યું કે, 22 જૂને મોદીનો આગામી નંબર.
રાહુલ ગાંધીએ મોદી સરકાર પર કેન્દ્રીય એજન્સીઓનો દુરુપયોગ કરવાનો આરોપ લગાવ્યો
રાહુલ ગાંધી તેમના સંબોધનમાં, તેમણે ભારતમાં સત્તારૂઢ ભારતીય જનતા પાર્ટી (BJP) પર લોકોને ધમકી આપવા અને દેશની એજન્સીઓનો દુરુપયોગ કરવાનો આરોપ પણ લગાવ્યો. તેમણે કહ્યું કે, ભાજપ લોકોને ધમકાવી રહી છે અને સરકારી એજન્સીઓનો દુરુપયોગ કરી રહી છે. ભારત જોડો યાત્રા શરૂ કરવામાં આવી હતી કારણ કે ભાજપ-રાષ્ટ્રીય સ્વયંસેવક સંઘ (RSS) લોકો સાથે જોડાવા માટે જરૂરી તમામ માધ્યમોને નિયંત્રિત કરે છે.
રાહુલ ગાંધી તેમના અમેરિકન પ્રવાસ દરમિયાન સાંસદોને મળશે
કોંગ્રેસ નેતા મંગળવારે અમેરિકાના ત્રણ શહેરોની મુલાકાતે પહોંચ્યા હતા. આ દરમિયાન તેઓ ભારતીય પ્રવાસીઓ સાથે વાતચીત કરશે અને અમેરિકન સાંસદોને પણ મળશે. ઇન્ડિયન ઓવરસીઝ કોંગ્રેસના પ્રમુખ સામ પિત્રોડાએ ગયા અઠવાડિયે કહ્યું હતું કે ગાંધીની મુલાકાતનો હેતુ સહિયારા મૂલ્યો અને વાસ્તવિક લોકશાહીના વિઝનને પ્રોત્સાહન આપવાનો હતો.