ભરૂચ.
ભરૂચ જીલ્લાના હાંસોટ તાલુકાના રાયમા ગામ નજીક વાલેનેર પાટીયા પાસે ગમખ્વાર અકસ્માત સર્જાયો હતો. જેમાં એક કાર આગળ જતાં કન્ટેનર સાથે અથડાઈ હતી. આ અકસ્માતમાં કારમાં સવાર 3માંથી 2 યુવકોના ઘટનાસ્થળે જ મોત નીપજ્યા હતા, જ્યારે અન્ય એક યુવક ગંભીર રીતે ઘાયલ થયો હતો, જેને સારવાર માટે હોસ્પિટલમાં દાખલ કરવામાં આવ્યો છે.
આ અંગે પ્રાપ્ત માહિતી અનુસાર હાંસોટ રોડ પર આવેલી મા રેસીડેન્સીમાં રહેતો ભાવિક પટેલ સોસાયટીમાં રહેતા તેના મિત્રો વિરલ પટેલ અને ભદ્રેશ પટેલ સાથે કારમાં ઓલપાડ માર્ગેથી ઘરે પરત ફરી રહ્યો હતો. દરમિયાન રાયમા ગામ નજીક વાલનેર પાટિયા પાસે આગળ જતા કન્ટેનર ચાલકે સિગ્નલ ન બતાવતા એકાએક વળાંક લીધો હતો અને કાર પાછળથી આવતી ભાવિક પટેલની કાર કન્ટેનર સાથે ધડાકાભેર અથડાઈ હતી. આ અકસ્માતમાં ભાવિક અને વિરલનું ઘટનાસ્થળે જ મોત નીપજ્યું હતું, જ્યારે ભદ્રેશ ગંભીર રીતે ઘાયલ થયો હતો.
આ અકસ્માત બાદ નજીકની કંપનીના કર્મચારીઓ અને અન્ય કારમાંથી આવતા મૃતકના મિત્રો ઘટના સ્થળે પહોંચી ગયા હતા. પોલીસને જાણ કરતાં 108 અને કાફલો ઘટના સ્થળે પહોંચી ગયો હતો. આ મામલે હાંસોટ પોલીસે અકસ્માતનો ગુનો નોંધી આગળની કાર્યવાહી હાથ ધરી છે.