ગઈકાલે યોજાયેલી યુનિયન પબ્લિક સર્વિસ કમિશન (UPSC)ની સ્પર્ધાત્મક પરીક્ષામાં રાજકોટના 2099 સહિત રાજ્યભરના 25 હજાર ઉમેદવારોએ હાજરી આપી હતી. પરંતુ પેપર લાંબુ અને અઘરું હોવાથી ઘણા ઉમેદવારો મુંઝવણમાં મુકાયા હતા. UPSC પરીક્ષાના પ્રથમ સત્રમાં જનરલ સ્ટડીઝનું પેપર લેવામાં આવ્યું હતું. જ્યારે બીજા તબક્કાનું પેપર સરળ રહ્યું હતું. આ પરીક્ષાનું પરિણામ આગામી 20 દિવસમાં જાહેર કરવામાં આવશે.
સામાન્ય અભ્યાસનું પેપર અઘરું નીકળ્યું હોવાનો ઉમેદવારોએ અભિપ્રાય વ્યક્ત કર્યો હતો. પ્રશ્ન વિકલ્પમાં પણ વિકલ્પ પેટર્નથી ઉમેદવારો મૂંઝવણમાં મુકાયા હતા. પ્રશ્નપત્રમાં G-20, રશિયા-યુક્રેન યુદ્ધ અને બંધારણ સંબંધિત પ્રશ્નો પૂછવામાં આવ્યા હતા. પેપર પ્રમાણમાં અઘરું હોવાથી મેરીટ નીચું જશે તેવો મત ઉમેદવારોએ વ્યક્ત કર્યો હતો.
UPSC પ્રિલિમિનરી પરીક્ષા અમદાવાદ અને રાજકોટ કેન્દ્રો પર જ લેવાઈ રહી હતી. આ બંને કેન્દ્રો પર રાજ્યભરમાંથી લગભગ 25,000 ઉમેદવારોએ પરીક્ષા આપી હતી. પ્રથમ તબક્કાની પરીક્ષા સવારે 9-30 થી 11-30 અને બીજા તબક્કાની પરીક્ષા બપોરે 2-30 થી 4-30 દરમિયાન લેવામાં આવી હતી. પરીક્ષા કેન્દ્રમાં એક કલાક પહેલા ઉમેદવારોને ચેક કરીને પ્રવેશ આપવામાં આવ્યો હતો. આજે દેશભરમાં 10 લાખથી વધુ ઉમેદવારોએ પરીક્ષા આપી હતી.