વડોદરા.
કાળઝાળ ગરમી વચ્ચે વડોદરામાં આગની ઘટનાઓ સતત વધી રહી છે. વાહનો, ગોડાઉન અને ઝાડીઓમાં આગ લાગવાના બનાવો એક પછી એક સામે આવી રહ્યા છે. પરિણામે ફાયર સ્ટેશનના ફોન સતત રણકતા રહે છે. દરમિયાન શહેરની એક ફિનાઇલ બનાવતી કંપનીમાં આગ લાગવાની ઘટના પ્રકાશમાં આવી છે.
આ અંગે પ્રાપ્ત વિગતો મુજબ શહેરના દુમાડ ચોકડીથી સાવલી તરફ જતા રોડ પર રંધાવા ટ્રાન્સપોર્ટની પાછળ ફિનાઈલ બનાવતી કુસુમ ઈન્ડસ્ટ્રીઝનું ગોડાઉન આવેલું છે. આ ગોડાઉનમાં મોડી સાંજે અચાનક આગ ફાટી નીકળી હતી. ગોડાઉનમાં ફિનાઈલ અને પેકિંગ બોક્સ હોવાના કારણે આગએ વિકરાળ સ્વરૂપ ધારણ કરી લેતા નાસભાગ મચી ગઈ હતી.
આગની જાણ થતાં જ વડોદરા ફાયર બ્રિગેડનો કાફલો તાત્કાલિક ઘટનાસ્થળે પહોંચી ગયો હતો અને આગને કાબૂમાં લેવાના પ્રયાસો શરૂ કર્યા હતા. હાલ ફાયરના જવાનો દ્વારા પાણીની કેનનનો ઉપયોગ કરીને આગને કાબુમાં લેવાનો સતત પ્રયાસ કરવામાં આવી રહ્યો છે. (ફોટો ક્રેડિટ: ફાઈલ ફોટો)