વલસાડ.
ગુજરાતમાં અકસ્માતોની સંખ્યામાં ચિંતાજનક વધારો જોવા મળી રહ્યો છે જેમાં ઘણા નિર્દોષ લોકો જીવ ગુમાવી રહ્યા છે. દરમિયાન વલસાડ જિલ્લાના સરોડી હાઈવે પર હિટ એન્ડ રનની ઘટનામાં એક રાહદારીનું ઘટનાસ્થળે જ મોત નીપજ્યું હતું. હિટ એન્ડ રનની આ ઘટનામાં કાર ચાલક વૃદ્ધાને હવામાં ફેંકી સુરત તરફ ભાગી ગયો હોવાનું સીસીટીવીમાં કેદ થયું છે.
આ અંગે પ્રાપ્ત માહિતી અનુસાર, વલસાડના સરોધી પહાલ પાલિયામાં રહેતા મણીલાલ નાયક આજે બપોરે ફૂલ ખરીદવા માટે સરોધી હાઈવે પરથી પસાર થઈ રહ્યા હતા. દરમિયાન મણિલાલને પાછળથી આવતી કારે ટક્કર મારતાં તેઓ ફૂટબોલની જેમ 10 ફૂટ દૂર પડ્યા હતા. જેના કારણે મણિલાલનું ઘટનાસ્થળે જ મોત થયું હતું.
આ અકસ્માત બાદ કાર ચાલક સુરત તરફ ભાગી ગયો હતો. બીજી તરફ અકસ્માત બાદ આસપાસના લોકો ઘટનાસ્થળે એકત્ર થઈ ગયા હતા અને પોલીસ અને 108ને જાણ કરી હતી. હાલ પોલીસે સીસીટીવી ફૂટેજના આધારે આ કેસમાં અકસ્માત બાદ ફરાર થઈ ગયેલા કાર ચાલકની ધરપકડ કરવા તપાસ શરૂ કરી છે.