ભાવનગર જિલ્લામાં આગામી તા. 2થી 6મે દરમિયાન નિસર્ગ વાવાઝોડાની સંભાવનાને ધ્યાને લઈ જિલ્લા કલેક્ટર  ગૌરાંગ મકવાણાના માર્ગદર્શન હેઠળ જિલ્લા વહિવટી તંત્ર દ્વારા વાવાઝોડાથી કોઈ જાનમાલનું નુકસાન કે અન્ય કોઈ મુશ્કેલી ઉભી ન થાય તે માટે પૂર્વ આયોજનના ભાગરૂપે વિવિધ પગલાઓ લેવામા આવી રહ્યા છે. પૂર્વ તૈયારીના ભાગરૂપે જિલ્લા કલેક્ટર દ્વારા જિલ્લા કક્ષાના અધિકારીઓ સાથે બેઠક યોજી વિગતવાર સૂચના અપાઈ હતી. તેમજ તમામ વિભાગોને જરૂરી સ્ટાફ તેમજ મશીનરી સાથે કાર્યાન્વિત કરવામાં આવ્યા હતા. સંભવિત વાવાઝોડા, ભારે વરસાદની પૂર્વ તૈયારી માટે તમામ પ્રાંત અધિકારીઓ, મામલતદારઓ, તાલુકા વિકાસ અધિકારીઓ અને ચીફ ઓફિસની આજ રોજ વીડિયો કોન્ફરન્સ યોજી સંબંધિત વિભાગોના અધિકારીઓને કામગીરીનું વ્યવસ્થાપન કરવા જણાવવામાં આવ્યું હતું. તેમજ કરેલી કામગીરીની સમીક્ષા કરવામાં આવી હતી. તેમજ જિલ્લા- તાલુકા કક્ષાએ ડિઝાસ્ટર મેનેજમેન્ટ સેલના કંટ્રોલરૂમ કાર્યરત કરવામાં આવ્યા છે. સંભવિત વાવાઝોડાને લઇ ભાવનગરના 4 તાલુકાઓના સંભવિત અસરગ્રસ્ત 34 ગામોની અધિકારીઓએ મુલાકાત લીધી છે. 

- Advertisement -

તંત્ર દ્વારા બે દિવસની વિશેષ ડ્રાઇવ ચલાવી રાહત બચાવના સાધનો જેવા કે જનરેટર સેટ, લાઇફ બોય, લાઇફ જેકેટ્સ તૈયાર કરાયા હતા. ભાવનગર, મહુવા, ઘોઘા તેમજ તળાજા તાલુકાના નીચાણવાળા વિસ્તારના સંભવિત અસરગ્રસ્ત 34 ગામોમાં તાલુકા કક્ષાની ટીમો દ્વારા ગામોની મુલાકાત લઈ સ્થાનિક સરપંચ, તલાટી કમ મંત્રી, રેશનશોપ ડીલર, એમ.ડી.એમ. સંચાલક, આપદા મિત્ર અને ગ્રામસેવક સાથે રાખી પરિસ્થિતિને પહોંચી વળવા માટે અવગત કરવામાં આવ્યા છે. GSDMA દ્વારા અમલી આપદામિત્ર પ્રોજેક્ટ અંતર્ગત તાલીમ પામેલા કુલ 140 આપદામિત્રો તાલુકા દીઠ 12 અને મહાનગરપાલિકા વિસ્તારના 20 ઉપલબ્ધ કરવામાં આવ્યા છે. તેમજ સંભવિત અસરગ્રસ્ત ચારેય તાલુકા માટે વર્ગ-1ના અધિકારીની લાયઝનીંગ અધિકારી તરીકે નિમણૂંક કરવામાં આવી છે. હાલ જિલ્લાના દરિયાકાંઠાના નજીકના વિસ્તારોમાં COVID-19 અંતર્ગત ક્વોરન્ટીન ફેસેલિટી રાખવામાં આવી નથી. બચાવ અને રાહત ટીમો માટે જરૂરીયાત મુજબની 200 PPE કિટ, હેન્ડ ગ્લોઝ, માસ્ક, સેનિટાઇઝર્સ અનામત રાખવામાં આવ્યા છે. DG સેટ્સ, ક્રેન, જીવન બચાવ નૌકાઓ, મોબાઇલ, મોબાઇલ ટાવરોની ઉપલબ્ધી માટેની યાદી તૈયાર કરવામાં આવી છે. રેઈન ગેજ ચાલુ હાલતમાં હોવાની પુન: ચકાસણી તેમજ રેઈન ગેજના લોકેશન લેવામાં આવ્યા છે.

આ પણ વાંચો:-  રેપિડ ટેસ્ટ કીટમાં ખામી હોવા છતાં ચાઇનાથી તબીબી ઉપકરણોની આયાત ચાલુ રહેશે

હાલમાં કોઈ માછીમારો દરિયામાં નથી તેમજ માછીમારો દરિયો ખેડે નહીં તેની તકેદારીના ભાગરૂપે મરીન પોલીસ અને ફીશરીસ ડીપાર્ટમેન્ટ દ્વારા સતત મોનિટરિંગ શરૂ છે.  સંભવિત અસરગ્રસ્ત ગામોમાં રહેલ કુલ 168 સગર્ભા મહિલાઓની યાદી તૈયાર કરી શીફ્ટિંગનું આયોજન હાથ ધરવામાં આવ્યું છે. સામાજિક સંસ્થાઓ તેમજ પ્રતિષ્ઠિત દાતાઓ ભાવનગર 13, ઘોઘા 24, મહુવા 16 અને તળાજા 10 મળી કુલ 63 NGO તથા દાતાઓની યાદી તંત્ર દ્વારા મદદરૂપ થવા તૈયાર કરવામાં આવી છે.