ડીસા.
બનાસકાંઠા જિલ્લામાં છેલ્લા કેટલાક સમયથી ખનીજ માફિયાઓનો દબદબો હોવાની ફરિયાદો મળતા ખાણ અને ખનીજ વિભાગ હરકતમાં આવ્યું છે. જેમાં ડીસા નજીકથી પસાર થતી બનાસ નદીમાંથી ખનીજ ચોરી ઝડપી પાડી આગળની કાર્યવાહી હાથ ધરી છે.
આ અંગે પ્રાપ્ત વિગતો મુજબ ડીસા નજીક બનાસ નદીમાં મોડી રાત્રે ખનીજ ચોરીની ફરિયાદના આધારે ભૂસ્તરશાસ્ત્રી ગુરૂપ્રીતસિંહે અલગથી ટીમ બનાવી તપાસ હાથ ધરી હતી.
દરમિયાન વાગરોલ અને દાંતીવાડા કોલોની પાસેથી સાદી રેતીનું વહન કરતી વખતે ટ્રેલરને અટકાવી તેની તપાસ કરતાં તેમાં રોયલ્ટી પાસ કરતાં 3 ટન વધુ રેતી હોવાનું જણાવાયું હતું. જે બાદ આ મામલે વધુ તપાસ કરતા ભુસ્તર શાસ્ત્રીએ રાણપુર નજીકથી પસાર થતા બનાસ નદીમાં તપાસ કરતા રોયલ્ટી ભરેલ રેતી વગરના 5 ટ્રેલર મળી આવ્યા હતા.
મોડી રાત્રીના ચેકીંગ દરમિયાન ભુસ્તર શાસ્ત્રીએ રાણપુર નજીકથી ગેરકાયદેસર ખનન કરતા 5 ટ્રેલર અને હિટાચી મશીન જપ્ત કર્યા હતા. જે બાદ ભૂસ્તર વિભાગની ટીમે રાણપુર નદીમાં આવેલી લીઝની માપણી કરી દંડ વસૂલવા સહિતની આગળની કાર્યવાહી હાથ ધરી છે.