ગુજરાત કોંગ્રેસે રાજ્યની ભાજપ સરકાર પર કોરોના માહમારીના વાસ્તવિક આંકડા છુપાવવામાં આવી રહ્યા હોવાનો સણસણતો આક્ષેપ કરવામાં આવ્યો છે. અગાઉ પણ ભાજપ સરકારે ગુજરાતમાં ટેસ્ટની સંખ્યા એકાએક ઘટાડી દીધી હોવાથી કોંગ્રેસે રાજ્ય સરકારને સાણસામાં લીધી હતી ત્યારે હવે વધુ એક વખત કોંગ્રેસે કોરોનાના વાસ્તવિક આંકડાના મુદ્દે સરકારને ઘેરવાનો પ્રયાસ કર્યો છે.

- Advertisement -

કોંગ્રેસના મતે રાજ્ય સરકાર કોરોના મહામારીનું ધુંધળું ચિત્ર રજૂ કરીને ગુજરાતમાં પોઝિટિવ કેસના દર્દીઓની સંખ્યા ઓછી થઈ હોવાનું પ્રસ્થાપિત કરી રહી છે. ગુજરાત સરકારના કોરોના વાયરસના સત્તાવાર ડેશબોર્ડ ઉપરથી કેટલીક માહિતી હટાવી લેવાને પગલે પણ કોંગ્રેસે પ્રહાર કર્યો હતો. આ ઉપરાંત દૈનિક પ્રેસ બ્રીફિંગ પણ કોના ઈશારે અટકાવવામાં આવ્યું છે તેવો સવાલ કર્યો હતો. રાજ્ય સરકારના સત્તાવાર કોરોના ડેશબોર્ડ ઉપરથી રાજ્યમાં નોંધાતા દૈનિક કેસ તેમજ શરૂઆતથી અત્યાર સુધીના કેસોનો આંકડો ઉપરાંત રાજ્યના જિલ્લાવાર દરરોજ નોંધાતા કેસો તેમજ કુલ પોઝિટિવ કેસોની વિગતો હટાવી લેવામાં આવી છે. આ મુદ્દે વિપક્ષ કોંગ્રેસે સરકાર સામે કોરોનાના ખોટા આંકડા છુપાવવામાં આવતા હોવાનો આક્ષેપ કર્યો છે.

ગુજરાત કોંગ્રેસના પ્રવક્તા મનિષ દોષીએ આક્ષેપ કરતા જણાવ્યું કે રાજ્યની ભાજપ સરકાર કોરોના વાયરસના સંક્રમણને અટકાવવાને બદલે આંકડાઓ છુપાવવામાં વ્યસ્ત છે. રાજ્ય સરકારે આરોગ્ય અગ્રસચિવ ડો. જયંતિ રવિની પ્રેસ કોન્ફરન્સ બંધ કરાવી દીધી તેમજ ડેશબોર્ડમાંથી મહત્વની વિગતો પણ હટાવી દીધી છે. સરકાર કોરોના વાયરસના સંક્રમણને અટકાવવામા નિષ્ફળ ગઈ છે ત્યારે હવે આરોગ્ય વિભાગે ભીનું સંકેલવાના પ્રયાસો શરૂ કર્યા હોય તેમ લાગે છે. તેમણે આક્ષેપ કર્યો હતો કે રાજ્યના સત્તાધીશો લોકોના આરોગ્ય સાથે ગંભીર ચેડા કરી રહ્યા છે.

મનીષ દોષીના જણાવ્યા મુજબ આ બધું જ સરકાર રાજ્યમાં કોરોનાના કેસો ઘટ્યા હોવાનું ખોટું ચિત્ર ઊભું કરવા માટે કરી રહી છે. અગાઉ પણ રાજ્ય સરકારે ટેસ્ટનું પ્રમાણ ઘટાડી દીધું હતું પરંતુ તેમ છતા કેસો વધતા જતા હતા. હવે કોરોના ડેશબોર્ડમાંથી વિગતો હટાવીને આભાસી ચિત્ર ઉભું કરાઈ રહ્યું છે.

આ પણ વાંચો:-  ગુલબાઇ ટેકરાના માઈક્રો કન્ટેઇનમેન્ટ ઝોનને સ્થાનિકોએ ખુલ્લો કર્યો

સરકારે એકાએક કોરોનાની જિલ્લાવાર સંખ્યા અને વિગતો આપવાનું બંધ કરી દીધું છે તેમજ પ્રેસ કોન્ફરન્સ પણ બંધ કરાવી દીધી છે હવે કોરોના ડેશબોર્ડમાંથી વિગતો ગાયબ કરી દેવામાં આવી છે. સરકાર એકાએક કોરોનાગ્રસ્ત દર્દીઓની સારવાર બાદ તેમને ડિસ્ચાર્જ કરાયા તેના પર ફોકસ કરી રહી છે તેમ મનીષ દોષીએ વધુમાં ઉમેર્યું હતું.