કોરોના વાયરસને નાથવા લાગુ કરાયેલા લોકડાઉન બાદ કેન્દ્ર સરકારે તબક્કાવાર અર્થતંત્રને ખોલવા માટે જાહેર કરેલા અનલોક-1 તેમજ પીએમ મોદી દ્વારા અર્થતંત્રમાં વિકાસ ચોક્કસ પરત ફરશે તેવા આશાવાદી નિવેદન પાછળ સ્થાનિક શેરબજારમાં તેજી જોવા મળી છે. પાંચ દિવસની રેલી છઠ્ઠા દિવસે પણ આગળ ધપતા પોઝિટિવ ગ્લોબલ અને ડોમેસ્ટિક પરિબળોના જોરે તેમજ વૈશ્વિક ફંડોની આકર્ષક લેવાલીના ટેકે સેન્સેક્સે ફરી એક વખત 34,000ની સપાટી તેમજ નિફ્ટીએ મહત્વની 10,000ની સપાટી કૂદાવી હતી. બુધવારના ઓપનિંગ સેશનમાં જ એચડીએફસીના બન્ને કાઉન્ટર્સ, આઈસીઆઈસીઆઈ બેન્ક તેમજ રિલાયન્સ ઈન્ડસ્ટ્રીઝના શેરમાં ઉછાળો નોંધાયો હતો.

- Advertisement -

બુધવારે બોમ્બે સ્ટોક એક્સચેન્જનો બેન્ચમાર્ક સેન્સેક્સ ઉપરમાં 34,422.71ની સપાટીને સ્પર્શ્યો હતો. એક તબક્કે 513.91 પોઈન્ટ અર્થાત 1.52 ટકાનો ઉછાળો જોવા મળ્યો હતો. નિફ્ટી આંક પણ ખુલતામાં 164.40 પોઈન્ટ વધીને 10,143.50ની સપાટીએ ટ્રેડ થયો છે. વૈશ્વિક મહામારી વચ્ચે ભારતીય અર્થતંત્રની ગાડી પાટા પર આવવાના આશાવાદ તેમજ વૈશ્વિક ફંડોના વેલ્યૂ બાઈંગના જોરે સ્થાનિક શેરબજારમાં સતત છઠ્ઠા સેશનમાં તેજી છવાયેલી રહી હતી. બજાજ ફાઈનાન્સમાં સૌથી વધુ છ ટકાનો ઉછાળો હતો. એક્સિસ બેન્ક, ઈન્ડસઈન્ડ બેન્ક, ઓએનજીસી, ટેક મહિન્દ્રા અને એચડીએફસી બેન્કના કાઉન્ટરમાં લાવલાવ જોવા મળ્યું હતુ.

બીજીતરફ આઈટી શેરો તેમજ ટેલિકોમ શેરોમાં વેચવાલીનું દબાણ રહેતા એક કલાકના ટ્રેડિંગ બાદ પ્રારંભિક ઉછાળો મર્યાદિત રહ્યો હતો. વૈશ્વિક ફંડોએ મંગળવારે 7,498.29 કરોડની નેટ લેવાલી કરી હતી. શેરબજાર છેલ્લા કેટલાક દિવસથી ઊંચો બેઝ બનાવવા મથી રહ્યું છે. જેને પગલે આગામી સમયમાં પોઝિટિવ સંકેતોને પગલે શેરોમાં વધુ લેવાલી થકી તેજી આગળ વધવાનો આશાવાદ જણાય છે તેમ એનાલિસ્ટ્સનું માનવું છે.

વૈશ્વિક સ્તરે પણ અર્થતંત્ર ધીરે ધીરે સ્થિર થઈ રહ્યું હોવાના સંકેતોથી ગ્લોબલ માર્કેટમાં રેલીને પગલે ઘરઆંગણે શેરબજારોમાં પ્રોત્સાહક ઉછાળો જોવા મળ્યો છે. વિદેશના બજારોમાં શાંઘાઈ, હોંગકોંગ, ટોક્યો અને સીઓલમાં બે ટકાનો ઉછાળો હતો. અમેરિકામાં અશ્વેતના કસ્ટડીમાં મોતને પગલે હિંસક તોફાનો બાદ ઈમર્જન્સીની સ્થિતિ વચ્ચે શેરબજારમાં ઉછાળો રહ્યો હતો અને ડાઉ જોન્સ 267 પોઈન્ટ વધીને જ્યારે નાસ્ડેક 56 પોઈન્ટના ઉછાળે બંધ રહ્યા હતા.  

આ પણ વાંચો:-  દિલ્હી, મુંબઇથી 90-120 મિનિટની ફ્લાઇટનું મિનિમમ ભાડું 3500 અને વધુમાં વધુ 10 હજાર રૂપિયા રહેશે: સરકાર

લેટેસ્ટ ન્યૂઝથી અપડેટ રહેવા માટે ક્લિક કરીને જોડાઓ ન્યૂઝ ફોર ગુજરાતી સાથે.

તમે અમને ફેસબુક, ટ્વીટર, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

LEAVE A REPLY