તાલિબાન શાસિત અફઘાનિસ્તાન પાકિસ્તાનને પાણી પુરવઠો મર્યાદિત કરવાની અને નદી પર બંધ બાંધવાની તૈયારી કરી રહ્યું છે. અફઘાન માહિતી મંત્રાલયના જણાવ્યા અનુસાર, તાલિબાનના સર્વોચ્ચ નેતા મૌલવી હિબતુલ્લાહ અખુંદઝાદાએ કુનાર નદી પર બને તેટલો જલ્દી બંધ બાંધવાનો આદેશ આપ્યો છે. આ પગલું અફઘાનિસ્તાન અને પાકિસ્તાન વચ્ચેના તાજેતરના યુદ્ધ પછી લેવામાં આવી રહ્યું છે, જેમાં સેંકડો લોકો માર્યા ગયા હતા. અફઘાનિસ્તાનનો આ નિર્ણય ભારતના પાકિસ્તાન સાથે પાણીની વહેંચણીના નિર્ણય બાદ આવ્યો છે. ભારતે સિંધુ જળ સંધિને સ્થગિત કરી દીધી, જે હેઠળ તે ત્રણ પશ્ચિમી નદીઓના પાણીને વહેંચે છે. પાકિસ્તાન સમર્થિત આતંકવાદીઓ દ્વારા 22 એપ્રિલે પહેલગામમાં 26 નાગરિકોની હત્યા બાદ આ પગલું લેવામાં આવ્યું હતું.
અફઘાનિસ્તાનના જળ અને ઉર્જા મંત્રાલયે જણાવ્યું હતું કે સર્વોચ્ચ નેતા અખુંદઝાદાએ મંત્રાલયને કુનાર નદી પર ડેમનું બાંધકામ ઝડપથી શરૂ કરવા અને સ્થાનિક કંપનીઓ સાથે કરાર પર હસ્તાક્ષર કરવાનો નિર્દેશ આપ્યો છે. નાયબ માહિતી પ્રધાન મુહાજેર ફરાહીએ ગુરુવારે આ માહિતી શેર કરી. લંડન સ્થિત અફઘાનિસ્તાન પત્રકાર સામી યુસુફઝઈએ કહ્યું, ‘ભારત પછી હવે કદાચ અફઘાનિસ્તાનનો વારો છે કે પાકિસ્તાનનો પાણી પુરવઠો મર્યાદિત કરવાનો.’ યુસુફઝાઈના જણાવ્યા મુજબ, સર્વોચ્ચ નેતાએ મંત્રાલયને વિદેશી કંપનીઓની રાહ જોવાને બદલે સ્થાનિક અફઘાન કંપનીઓ સાથે કરાર કરવાનો આદેશ આપ્યો હતો.
કુનાર નદી વિશે જાણો
480 કિમી લાંબી કુનાર નદી અફઘાનિસ્તાનના હિંદુ કુશ પર્વતોમાં પાકિસ્તાન સરહદની નજીક બ્રોગીલ પાસ પાસે શરૂ થાય છે. તે કુનાર અને નાંગરહાર પ્રાંતમાંથી દક્ષિણ તરફ વહે છે. તે પછી પાકિસ્તાનના ખૈબર પખ્તુનખ્વામાં પ્રવેશ કરે છે, જ્યાં તે જલાલાબાદ શહેર નજીક કાબુલ નદીમાં જોડાય છે. કુનાર નદીને પાકિસ્તાનમાં ચિત્રાલ નદી કહેવામાં આવે છે. તે અફઘાનિસ્તાન અને પાકિસ્તાન વચ્ચેની સૌથી મોટી અને સૌથી વધુ પાણીવાળી ટ્રાન્સબાઉન્ડરી નદી છે. કાબુલ નદી એટોક નજીક સિંધુ નદીમાં જોડાય છે અને પાકિસ્તાનના ખૈબર પખ્તુનખ્વા પ્રાંતની સિંચાઈ અને અન્ય પાણીની જરૂરિયાતો માટે મહત્વપૂર્ણ છે.
