રશિયાના રાષ્ટ્રપતિ વ્લાદિમીર પુતિનના રોકાણ અને આર્થિક સહયોગ માટેના વિશેષ દૂત કિરિલ દિમિત્રીવે શુક્રવારે કહ્યું હતું કે રશિયા, યુએસ અને યુક્રેન હવે યુદ્ધને સમાપ્ત કરવા માટે રાજદ્વારી ઉકેલની “ખૂબ નજીક” છે. અમેરિકી અધિકારીઓ સાથે વાટાઘાટો માટે અમેરિકી રાજધાની વોશિંગ્ટન પહોંચ્યા બાદ CNN સાથે વાત કરતા દિમિત્રીવે જણાવ્યું હતું કે ડોનાલ્ડ ટ્રમ્પ અને વ્લાદિમીર પુતિન વચ્ચેની પ્રસ્તાવિત બેઠક રદ કરવામાં આવી નથી પરંતુ “પછીની તારીખે” યોજાશે.
ટ્રમ્પ-પુતિન બેઠક મુલતવી
આ અઠવાડિયાની શરૂઆતમાં, ટ્રમ્પે કહ્યું હતું કે હંગેરીમાં પુટિન સાથેની તેમની બેઠક રદ કરવામાં આવી હતી કારણ કે રશિયા તાત્કાલિક યુદ્ધવિરામ માટે સંમત નહોતું અને વાટાઘાટોમાં પ્રગતિનો અભાવ જોવા મળ્યો હતો. ટ્રમ્પે કહ્યું હતું કે “આ બેઠક યોગ્ય સમયે નથી.” જો કે, દિમિત્રીવે શુક્રવારે દાવો કર્યો, “મને લાગે છે કે રશિયા, યુએસ અને યુક્રેન વાસ્તવમાં રાજદ્વારી ઉકેલની ખૂબ નજીક છે.” સંભવિત કરારમાં કઈ જોગવાઈઓ હશે તે તેમણે સ્પષ્ટ કર્યું નથી.
યુરોપિયન દેશો તરફથી યુદ્ધવિરામની નવી દરખાસ્ત
રોઇટર્સના અહેવાલ અનુસાર, યુરોપીયન દેશો વર્તમાન યુદ્ધ રેખાઓના આધારે યુદ્ધવિરામ પ્રસ્તાવ તૈયાર કરવા માટે યુક્રેન સાથે કામ કરી રહ્યા છે. આ દરખાસ્ત પહેલાથી જ ચાલી રહેલી વાટાઘાટોના મુદ્દાઓને આગળ લઈ જાય છે, જ્યારે મંત્રણામાં અમેરિકાની કેન્દ્રીય ભૂમિકા જાળવવા પર ભાર મૂકવામાં આવે છે.
દિમિત્રીવે કહ્યું, “રાષ્ટ્રપતિ ઝેલેન્સ્કી દ્વારા આ એક મોટું પગલું છે કે હવે તેમણે વર્તમાન યુદ્ધ રેખાઓ પર વાતચીતની જરૂરિયાત સ્વીકારી છે. પહેલા તેઓ કહેતા હતા કે રશિયાએ સંપૂર્ણપણે પીછેહઠ કરવી જોઈએ. તેથી મને લાગે છે કે હવે આપણે રાજદ્વારી ઉકેલની ખૂબ નજીક છીએ.”
રશિયાનું વલણ
રશિયાએ ફેબ્રુઆરી 2022 માં યુક્રેન પર મોટા પાયે આક્રમણ શરૂ કર્યું હતું. ગયા અઠવાડિયે, ટ્રમ્પે જાહેરાત કરી હતી કે તે અને પુતિન ટૂંક સમયમાં હંગેરીમાં યુદ્ધ સમાપ્ત કરવા અંગે ચર્ચા કરશે, પરંતુ પુતિન તરફથી હજુ સુધી કોઈ છૂટ મળવાના સંકેત મળ્યા નથી. રશિયાએ સતત માગણી કરી છે કે યુદ્ધવિરામ ત્યારે જ શક્ય બને જો યુક્રેન પહેલા કેટલાક વધુ પ્રદેશો છોડવા માટે સંમત થાય.
