કાયલ જેમિસનની અંતિમ ઓવરમાં શાનદાર બોલિંગથી ન્યૂઝીલેન્ડે રવિવારે ત્રીજી T20 ઈન્ટરનેશનલ મેચમાં વેસ્ટ ઈન્ડિઝને નવ રનથી હરાવ્યું હતું. આ રીતે ન્યૂઝીલેન્ડે પાંચ મેચની શ્રેણીમાં 2-1ની સરસાઈ મેળવી લીધી છે. ગુરુવારે રમાયેલી બીજી મેચમાં જેમિસને છેલ્લી ઓવર પણ ફેંકી હતી, જે ન્યૂઝીલેન્ડે ત્રણ રનથી જીતી હતી. વેસ્ટ ઈન્ડિઝે પ્રથમ મેચ સાત રને જીતી હતી. ત્રણેય મેચનો નિર્ણય છેલ્લી ઓવરમાં થઈ ગયો છે.
ન્યૂઝીલેન્ડે ટોસ જીતીને પ્રથમ બેટિંગ કરીને નવ વિકેટે 177 રન બનાવ્યા હતા. તે પછી, લક્ષ્યનો પીછો કરતી વખતે વેસ્ટ ઈન્ડિઝે 13મી ઓવરમાં 88 રનમાં આઠ વિકેટ ગુમાવી દીધી હતી, જેના કારણે એવું લાગી રહ્યું હતું કે ન્યૂઝીલેન્ડ સરળતાથી જીતી જશે. પરંતુ રોમારિયો શેફર્ડે 34 બોલમાં 49 રન અને શમર સ્પ્રિંગરે 20 બોલમાં 39 રન ફટકાર્યા હતા. જેના કારણે છેલ્લી ઓવરમાં વેસ્ટ ઈન્ડિઝને જીતવા માટે 14 રનની જરૂર હતી. શેફર્ડ અને અકેલ હોસીન ક્રિઝ પર હતા.
છેલ્લી ઓવરની બોલિંગની જવાબદારી ફરીથી ઊંચા ઝડપી બોલર જેમિસનને આપવામાં આવી હતી. તેણે સંયમ સાથે બોલિંગ કરી, પ્રથમ ચાર બોલમાં માત્ર બે રન આપ્યા અને પાંચમા બોલ પર શેફર્ડને આઉટ કરીને મેચનો અંત આણ્યો. રવિવારે ફરી એકવાર ટોપ ઓર્ડરના પતન બાદ પૂંછડીના બેટ્સમેનોએ વેસ્ટ ઈન્ડિઝના દાવને સંભાળી લીધો હતો.
મુલાકાતી ટીમે ઇનિંગ્સની બીજી ઓવરમાં જેકબ ડફીના બોલ પર બે વિકેટ ગુમાવી દીધી હતી. જેના કારણે પાવર પ્લેમાં ટીમનો સ્કોર બે વિકેટે 47 રન થઈ ગયો હતો. અને પછી વચ્ચેની ઓવરોમાં ટીમે 35 રનમાં છ વિકેટ ગુમાવી દીધી હતી. સ્પિનર ઈશ સોઢીએ 34 રનમાં ત્રણ વિકેટ લીધી હતી અને તે ‘પ્લેયર ઓફ ધ મેચ’ રહ્યો હતો. આ પહેલા ડેવોન કોનવેએ 34 બોલમાં 56 રન બનાવીને ન્યૂઝીલેન્ડની ઇનિંગની શરૂઆત કરી હતી. જોકે ટીમે પાંચ ઓવરમાં 31 રનમાં છ વિકેટ ગુમાવી દીધી હતી.
