રવિવારે રશિયાના દાગેસ્તાન ક્ષેત્રના મુખ્ય એરપોર્ટ પર ઇઝરાયેલના તેલ અવીવથી મુસાફરોના આગમનના વિરોધમાં સેંકડો લોકોએ પ્લેન લેન્ડિંગ સાઇટ પર પ્રદર્શન કર્યું હતું, જેનો વીડિયો સોશિયલ મીડિયા પર ઝડપથી વાયરલ થઈ રહ્યો છે. ભીડે સેમિટિક વિરોધી સૂત્રોચ્ચાર કર્યા. રશિયન સમાચાર એજન્સીઓએ પણ આ સમાચાર પ્રકાશિત કર્યા છે. રશિયન મીડિયામાં પ્રકાશિત અહેવાલો અનુસાર, ભીડે રશિયન એરલાઇન ‘રેડ વિંગ્સ’ના પ્લેનને ઘેરી લીધું હતું. સત્તાવાળાઓએ મખાચકલામાં એરપોર્ટ બંધ કરી દીધું હતું અને ત્યાં મોટી સંખ્યામાં પોલીસ દળો તૈનાત કરી દીધા હતા. તમને જણાવી દઈએ કે મખાચકલા એ દાગેસ્તાનની રાજધાની છે, જે મુખ્યત્વે મુસ્લિમ બહુલ પ્રદેશ છે. દાગેસ્તાનના સ્વાસ્થ્ય મંત્રાલય દ્વારા આ મામલાની માહિતી આપવામાં આવી હતી અને કહેવામાં આવ્યું હતું કે આ ઘટનામાં 20થી વધુ લોકો ઘાયલ થયા છે, જેમાંથી બેની હાલત ગંભીર છે. સોશિયલ મીડિયા પર વાયરલ થયેલા વીડિયોમાં જોવા મળી રહ્યું છે કે ભીડમાં કેટલાક લોકો પેલેસ્ટિનિયન ઝંડા લહેરાવી રહ્યા હતા અને અન્ય લોકોએ પોલીસની કારને પલટી મારવાનો પ્રયાસ કર્યો હતો. સોશિયલ મીડિયા પર વાયરલ થયેલા વીડિયોમાં જોવા મળી રહ્યું છે કે ભીડ ‘અલ્લાહ-હુ-અકબર’ના નારા લગાવી રહી હતી. વીડિયો ફૂટેજમાં ગુસ્સે ભરાયેલી ભીડને એરપોર્ટ પરથી ભાગતી સ્પષ્ટ જોઈ શકાય છે.