મુંબઈઃ વિદેશી પોર્ટફોલિયો રોકાણકારો (FPIs)એ જુલાઈના પ્રથમ સપ્તાહમાં શેરોમાં જોરદાર ખરીદી કરી હતી. FPIsએ પ્રથમ સપ્તાહના પાંચ ટ્રેડિંગ દિવસોમાં રૂ. 21,944 કરોડના શેર ખરીદ્યા હતા.
આ FPIs દ્વારા ખરીદીની ગતિને જોતાં જુલાઈ મહિનામાં ખરીદીનો આંકડો ચાલુ વર્ષના જૂન અને મે મહિનાની સંખ્યાને વટાવી જવાની શક્યતા છે. આ સતત પાંચમા મહિને FPIs દ્વારા ભારતીય શેરબજારોમાં શેરની ચોખ્ખી ખરીદી નોંધાવે તેવી શક્યતા છે. આ વિદેશી ફંડ્સની ખરીદીની આક્રમકતાને કારણે સેન્સેક્સ અને નિફ્ટી 50 સૂચકાંકો આ અઠવાડિયે નવા સર્વકાલીન ઉચ્ચ સ્તરે પહોંચ્યા છે.
NSDLના ડેટા અનુસાર, 3 જુલાઈથી 7 જુલાઈ સુધીના પાંચ દિવસમાં FPIsએ સ્ટોક્સમાં રૂ. 21,944 કરોડનું રોકાણ કર્યું છે. આ જંગી ખરીદી જૂન 2023માં રૂ. 47,148 કરોડની રેકોર્ડ કુલ ખરીદીના 46.54 ટકા અને મે 2023માં રૂ. 43,838 કરોડની ખરીદીના 50.05 ટકા જેટલી છે.
આ વર્ષે અત્યાર સુધી FPI ખરીદી માટે જૂન શ્રેષ્ઠ મહિનો રહ્યો છે. FPIs નાણાકીય સેવાઓ, ઓટોમોબાઈલ, કેપિટલ ગુડ્સ અને બાંધકામ સહિતના ક્ષેત્રોમાં કંપનીઓના શેરોમાં ભારે ખરીદી કરે છે. તેની સાથે એફએમસીજી અને પાવર શેરોમાં પણ ખરીદી વધી છે. જ્યારે આઈટી શેરોમાં વેચવાલીનો ટ્રેન્ડ રહ્યો છે.