ભારતના દબાણ વચ્ચે બ્રિટને ખાલિસ્તાની આતંકવાદી જૂથો વિરુદ્ધ મોટું ઐતિહાસિક પગલું ભર્યું છે. બ્રિટિશ સરકારે 4 ડિસેમ્બરે ગુરપ્રીત સિંહ રેહલ નામના વ્યક્તિ અને બબ્બર અકાલી લેહર સંગઠન પર આતંકવાદ સંબંધિત આરોપો હેઠળ પ્રતિબંધો લાદ્યા હતા. ખાસ કરીને બબ્બર ખાલસા ઈન્ટરનેશનલ નામના પ્રતિબંધિત ખાલિસ્તાની આતંકવાદી સંગઠન સાથે તેમની સાંઠગાંઠ માટે આ કાર્યવાહી કરવામાં આવી છે. આ પગલું બ્રિટનની નાણાકીય વ્યવસ્થાનો દુરુપયોગ કરતા ઉગ્રવાદીઓને ફટકો આપશે અને ભારત-યુકે આતંકવાદ વિરોધી સહકારને નવી તાકાત આપશે.
એસેટ ફ્રીઝ અને કંપનીઓ પર અસર
યુકે સરકારે આ પ્રતિબંધો કાઉન્ટર-ટેરરિઝમ (પ્રતિબંધો) (EU એક્ઝિટ) રેગ્યુલેશન્સ 2019 હેઠળ લાદ્યા છે. મુખ્ય પગલાંઓમાં શામેલ છે-
સંપત્તિ ફ્રીઝ: બ્રિટનમાં સ્થિત રેહલ, બબ્બર અકાલી લહેર અને તેમની સાથે સંકળાયેલી કંપનીઓની તમામ મિલકતો, ભંડોળ અને આર્થિક સંસાધનો તાત્કાલિક અસરથી સ્થગિત કરવામાં આવ્યા છે. બ્રિટિશ નાગરિકો અથવા સંસ્થાઓને HM ટ્રેઝરી દ્વારા લાઇસન્સ ન હોય ત્યાં સુધી આ સંસાધનો સાથે વ્યવહાર કરવાની અથવા ઉપલબ્ધ કરાવવાની પરવાનગી નથી.
કંપનીઓ પર અસરરેહલ સાથે જોડાયેલી સંસ્થાઓ સેવિંગ પંજાબ CIC, વ્હાઇટહોક કન્સલ્ટેશન લિમિટેડ અને અસંગઠિત સંસ્થા લોહા ડિઝાઇન્સ પર પણ પ્રતિબંધ મૂકવામાં આવ્યો છે.
ડિરેક્ટર પદ પર પ્રતિબંધ: ગુરપ્રીત સિંઘ રેહલને કોઈપણ કંપનીના ડિરેક્ટર બનવા અથવા તેના સંચાલનમાં પ્રત્યક્ષ/પરોક્ષ રીતે ભાગ લેવા પર પ્રતિબંધ મૂકવામાં આવ્યો છે.
