સોમવારે દક્ષિણ ફિલિપાઈન્સમાં બનેલી એક ઘટનાએ વર્ષો પહેલા ટાઈટેનિક દુર્ઘટનાની દર્દનાક યાદોને તાજી કરી દીધી છે. મળતી માહિતી મુજબ 350થી વધુ લોકોને લઈને જતું જહાજ મધરાત બાદ અચાનક દરિયામાં ડૂબી ગયું હતું. અત્યાર સુધી બહાર આવેલી માહિતી અનુસાર બચાવકર્મીઓએ અત્યાર સુધીમાં ઓછામાં ઓછા 18 મૃતદેહો બહાર કાઢ્યા છે. લગભગ 316 મુસાફરોને બચાવી લેવાયા બાદ પણ ઘણા લોકો હજુ પણ ગુમ છે.
કોસ્ટ ગાર્ડના અધિકારીઓએ જણાવ્યું હતું કે આંતર-ટાપુ કાર્ગો અને પેસેન્જર ફેરી M/V ત્રિશા કર્સ્ટિન-3 બંદર શહેર ઝામ્બોઆંગાથી સુલુ પ્રાંતના દક્ષિણ જોલો ટાપુ તરફ જઈ રહી હતી. ફેરીમાં 332 મુસાફરો અને 27 ક્રૂ મેમ્બર હતા. સ્થાનિક અહેવાલો અનુસાર, ટેકનિકલ ખામીને કારણે બોટ ડૂબી ગઈ હતી.
બચાવી લેવામાં આવેલા મુસાફરોમાંના એક મોહમ્મદ ખાને જણાવ્યું કે બોટ અચાનક એક તરફ નમેલી અને પાણી ભરાઈ ગઈ, જેના કારણે લોકો અંધારામાં દરિયામાં પડી ગયા. બોટમાં ખાન અને તેની પત્ની પણ સામેલ હતા, જેઓ તેમના છ મહિનાના બાળકને ખોળામાં લઈને જઈ રહ્યા હતા. તે અને તેની પત્નીનો બચાવ થયો હતો, પરંતુ તેનું બાળક ડૂબી ગયું હતું.
કોસ્ટ ગાર્ડના કમાન્ડર રોમેલ દુઆએ જણાવ્યું હતું કે કોસ્ટ ગાર્ડ અને નૌકાદળના જહાજો, એક સર્વેલન્સ એરક્રાફ્ટ, એર ફોર્સનું બ્લેક હોક હેલિકોપ્ટર અને માછીમારી બોટનો કાફલો બેસિલાનના દરિયાકાંઠે શોધ અને બચાવ કામગીરી કરી રહ્યા છે. દુઆએ કહ્યું કે બોટ ડૂબવાનું કારણ હજુ જાણી શકાયું નથી અને ઘટનાની તપાસ કરવામાં આવશે.
