ચેન્નાઈઃ ભારતીય ક્રિકેટ ટીમના ઓપનર અભિષેક શર્માએ T20 વર્લ્ડ કપ 2026ની સતત 4 ઈનિંગમાં. ફ્લોપ રહ્યા બાદ ગુરુવારે ઝિમ્બાબ્વે સામે રમાયેલી સુપર-8 મેચમાં તે ફોર્મમાં પાછો ફર્યો હતો. અભિષેકે અડધી સદી ફટકારીને ટીમને તોફાની શરૂઆત અપાવી અને મોટા સ્કોરનો પાયો નાખ્યો.
અભિષેક શર્માએ 30 બોલમાં 55 રન ફટકારીને ભારતને ચાર વિકેટે 256 રન બનાવ્યા હતા. પૂર્વ કેપ્ટન સુનીલ ગાવસ્કરે અભિષેક શર્માની પ્રશંસા કરી હતી. “અભિષેકે તેની ટેકનિકમાં ભિન્નતા દર્શાવી હતી અને બોલર બોલ છોડે ત્યાં સુધી રાહ જોતો હતો. તેના બેટની ઝડપ નિયંત્રિત અને સંતુલિત હતી, જેના કારણે શક્તિશાળી શોટ લાગ્યા,” તેણે મેચ પછી સ્ટાર સ્પોર્ટ્સ પર જણાવ્યું.
મેચ પહેલા અભિષેક ખરાબ ફોર્મ સામે ઝઝૂમી રહ્યો હતો. પેટની તકલીફ બાદ તે સતત ત્રણ વખત શૂન્ય પર આઉટ થયો હતો. ટીકા વધી રહી હતી અને ટીમ પર દબાણ હતું. પરંતુ આ મેચમાં તેની બોડી લેંગ્વેજ અલગ જ જોવા મળી હતી. તેણે સંકેત આપ્યો કે તે પહેલા જ બોલ પર સિંગલ લઈને ઉતાવળ નહીં કરે. ડ્રેસિંગ રૂમમાંથી સંદેશ સ્પષ્ટ હતો- ક્રિઝ પર રહો અને દાવને આગળ ધપાવો.
સંજુ સેમસન સાથે તેણે પ્રથમ વિકેટ માટે 48 રન જોડ્યા હતા. સેમસને 15 બોલમાં 24 રન બનાવીને દબાણ ઓછું કર્યું હતું. તેના આઉટ થયા બાદ અભિષેકે આક્રમક વલણ અપનાવ્યું હતું. તેણે ટીનોટેન્ડા માફોસા, બ્રાયન બેનેટ અને રિચાર્ડ નગારાવા પર મોટા શોટ લગાવ્યા. પાવરપ્લેના અંત સુધીમાં ભારતનો સ્કોર 80 રન સુધી પહોંચી ગયો હતો. અભિષેકે 26 બોલમાં પોતાની ફિફ્ટી પૂરી કરી હતી.
અભિષેક 55 રન બનાવીને આઉટ થયો હતો, પરંતુ તેણે ટીમને મજબૂત શરૂઆત અપાવી હતી. આ પછી હાર્દિક પંડ્યાએ 23 બોલમાં અણનમ 50 રન અને તિલક વર્માએ 16 બોલમાં 44 રન બનાવ્યા હતા. બંનેએ પાંચમી વિકેટ માટે 84 રન જોડ્યા અને ભારતે છેલ્લી પાંચ ઓવરમાં 80 રન બનાવ્યા.
જવાબમાં ઝિમ્બાબ્વે 184 રન જ બનાવી શકી હતી. બ્રાયન બેનેટે 97 રનની શાનદાર ઈનિંગ રમી હતી, પરંતુ અર્શદીપ સિંહે ત્રણ વિકેટ લઈને મેચ ભારતના કોથળામાં નાખી દીધી હતી. આ જીત સાથે ભારતનો નેટ રન રેટ સુધર્યો અને સેમિફાઇનલની રેસ રોમાંચક બની ગઈ. હવે કોલકાતામાં વેસ્ટ ઈન્ડિઝ સામેની મેચ નિર્ણાયક બની રહેશે.
