પાકિસ્તાને ઓસામા બિન લાદેનના પુત્રને લઈને ચોંકાવનારો દાવો કર્યો છે. પાકિસ્તાનનું કહેવું છે કે તાલિબાન ઓસામાના પુત્રને અફઘાનિસ્તાનમાં આમંત્રણ આપવા માંગે છે. આ સમાચારથી પાકિસ્તાનમાં ખળભળાટ મચી ગયો છે. સરહદ પર વધી રહેલા તણાવ વચ્ચે પાકિસ્તાન આર્મીની મીડિયા વિંગ ઈન્ટર-સર્વિસ પબ્લિક રિલેશન્સ (ISPR)ના ડાયરેક્ટર જનરલ (ડીજી) લેફ્ટનન્ટ જનરલ અહેમદ શરીફ ચૌધરીએ અફઘાન પ્રશાસનને કડક ચેતવણી આપી છે.
શું કહ્યું પાક સેનાએ?
લેફ્ટનન્ટ જનરલ અહેમદ શરીફ ચૌધરીએ અફઘાનિસ્તાનમાંથી ઉભરી રહેલા ‘આતંકવાદ’ પર એક પ્રેસ કોન્ફરન્સમાં મોટો દાવો કર્યો છે. DG ISPRએ કહ્યું કે અફઘાન તાલિબાનની બેવડી નીતિને હવે સહન કરવામાં આવશે નહીં. તેમણે કહ્યું- અફઘાન તાલિબાને નક્કી કરવું પડશે કે તેઓ TTP, અલ કાયદા, Daesh અને BLA જેવા આતંકવાદી સંગઠનો સાથે રહેવા માંગે છે કે પછી પાડોશી તરીકે પાકિસ્તાન સાથે. જનરલ ચૌધરીએ કહ્યું કે પાકિસ્તાન પાસે મજબૂત પુરાવા છે કે અફઘાનિસ્તાનની ધરતીનો પાકિસ્તાન અને ક્ષેત્રીય સુરક્ષાને અસ્થિર કરવા માટે સતત ઉપયોગ કરવામાં આવી રહ્યો છે. આતંકવાદીઓને ત્યાં ‘સેફ હેવ’ મળી રહ્યાં છે.
ઓસામાના પુત્રને અફઘાનિસ્તાનમાં આમંત્રણ આપી રહ્યું છે તાલિબાન?
પાકિસ્તાની ટીવી ચેનલ જિયો ન્યૂઝના એક કાર્યક્રમમાં બોલતા પાક સેનાના એક અધિકારીએ દાવો કર્યો હતો કે ‘અફઘાન તાલિબાન શાસને સરકારી ઈમારતોમાં આતંકવાદીઓને છૂપાવી દીધા છે. અફઘાન તાલિબાન શાસન ઓસામા બિન લાદેનના પુત્ર સહિત આતંકવાદી જૂથો સાથે સંબંધો ધરાવે છે.’ તેમણે કહ્યું, ‘અફઘાન તાલિબાન શાસન એક આતંકવાદી સંગઠન છે જેણે દેશ પર કબજો જમાવ્યો છે અને સંયુક્ત રાષ્ટ્ર પણ આ જ વાત કરી રહ્યું છે. તેઓ તેના (ઓસામા બિન લાદેનના) પુત્ર હમઝાના સંપર્કમાં છે અને તેને અફઘાનિસ્તાન આવવા કહ્યું છે.
હમઝા બિન લાદેન અને તાલિબાન સાંઠગાંઠ: રિપોર્ટમાં શું છે?
પાકિસ્તાનના આ ગભરાટની પાછળ પશ્ચિમી અને સ્વતંત્ર ગુપ્તચર એજન્સીઓનો અહેવાલ છે, જેણે 2019ના અમેરિકન દાવાઓને પલટી નાખ્યા છે. 2019માં અમેરિકાએ દાવો કર્યો હતો કે હમઝા બિન લાદેન હવાઈ હુમલામાં માર્યો ગયો હતો. પરંતુ તાજેતરના અહેવાલો અનુસાર, 35 વર્ષીય હમઝા માત્ર જીવતો નથી, પરંતુ તે કાબુલથી લગભગ 100 કિલોમીટર દૂર જલાલાબાદમાં એક ગુપ્ત જગ્યાએ છુપાયેલો છે. એવું કહેવામાં આવી રહ્યું છે કે હમઝા તેના ભાઈ અબ્દુલ્લા સાથે મળીને અલકાયદાને પુનર્જીવિત કરી રહ્યો છે અને તેને અલ કાયદાના નવા ચીફ (અમીર) તરીકે સ્વીકારવામાં આવ્યો છે.
તાલિબાનનું VIP રક્ષણ
દાવાઓ અનુસાર, અફઘાન તાલિબાનના ટોચના નેતાઓ હમઝા અને તેના પરિવારને માત્ર સુરક્ષા જ નથી આપી રહ્યા, પરંતુ 10થી વધુ આતંકવાદી તાલીમ શિબિરો સ્થાપિત કરવામાં પણ મદદ કરી રહ્યા છે.
