ચીને છ વર્ષના ગાળા બાદ ઉત્તર કોરિયા માટે પેસેન્જર ટ્રેન સેવા ફરી શરૂ કરી છે. બંને દેશોની રાજધાનીઓને જોડતી પ્રથમ ટ્રેન ગુરુવારે બેઇજિંગ રેલવે સ્ટેશનથી રવાના થઈ હતી. ચાઇના રેલ્વે ઓથોરિટી અનુસાર, ટ્રેન K27 શુક્રવારે સાંજે 6.07 કલાકે ઉત્તર કોરિયાની રાજધાની પ્યોંગયાંગ પહોંચશે. ટ્રેન અંદાજે 24 કલાક અને 41 મિનિટની મુસાફરી કરશે અને બોહાઈ સમુદ્રની ઉત્તરે સ્થિત સરહદી શહેર ડાંડોંગ ખાતે રૂટ પર રોકાશે.
ચીનના વિદેશ મંત્રાલયના પ્રવક્તાએ કહ્યું કે ચીન અને ઉત્તર કોરિયા “મૈત્રીપૂર્ણ પડોશીઓ” છે અને ક્રોસ બોર્ડર પેસેન્જર ટ્રેન સેવા લોકો-થી-લોકોના સંપર્કો અને વિનિમયને પ્રોત્સાહન આપે છે. તેમણે કહ્યું કે બંને દેશો આવા આદાન-પ્રદાનની સુવિધા માટે પરસ્પર સહયોગ અને સંવાદને મજબૂત બનાવવાનું સમર્થન કરે છે. નોંધનીય છે કે કોવિડ-19 રોગચાળો ફાટી નીકળ્યા બાદ વર્ષ 2020માં આ ટ્રેન સેવા બંધ કરવામાં આવી હતી. હવે ફરી શરૂ કરવામાં આવી છે.
રેલ્વે ઓથોરિટી અનુસાર, બેઇજિંગ અને પ્યોંગયાંગ વચ્ચેની આ ટ્રેન સેવા અઠવાડિયામાં ચાર દિવસ (સોમવાર, બુધવાર, ગુરુવાર અને શનિવાર) બંને દિશામાં ચાલશે. બેઇજિંગની એક ટ્રાવેલ એજન્સીના જણાવ્યા અનુસાર, ગુરુવારની પ્રથમ સફરની ટિકિટો સંપૂર્ણ રીતે વેચાઈ ગઈ હતી. જો કે આ ટિકિટો માત્ર બિઝનેસ વિઝા ધારકો માટે જ ઉપલબ્ધ હતી, કેટલીક સીટો હજુ પણ માર્ચ 18ની મુસાફરી માટે ઉપલબ્ધ છે.
સત્તાવાર ઝિન્હુઆ સમાચાર એજન્સીના જણાવ્યા અનુસાર ડાંડોંગ અને પ્યોંગયાંગ વચ્ચે ટૂંકા અંતરની ટ્રેન સેવા પણ દરરોજ બંને દિશામાં કાર્યરત થશે. તેની પ્રથમ ટ્રેન ગુરુવારે સવારે 10 વાગ્યે દાંડોંગથી ઉપડશે અને સાંજે 6:07 વાગ્યે પ્યોંગયાંગ પહોંચશે.
