મુંબઈથી અત્યારે એક મોટા સમાચાર સામે આવી રહ્યા છે. અહીં એક કરૂણ માર્ગ અકસ્માત સર્જાયો છે. કહેવામાં આવી રહ્યું છે કે અક્ષય કુમારની સિક્યોરિટી વાન એક ઓટો સાથે અથડાઈ હતી. આ ઘટના જુહુ ગાંધીગ્રામ રોડ પર બની હતી. મળતી માહિતી મુજબ, અક્ષય કુમાર શૂટિંગમાંથી પરત ફરી રહ્યો હતો. તેમની મર્સિડીઝ કારની આગળ એક સિક્યુરિટી વાન હંકારી રહી હતી. સિક્યોરિટી વાન સાથે અથડામણમાં ઓટો ચાલકને સામાન્ય ઈજાઓ થઈ હતી. તેને નજીકની હોસ્પિટલમાં દાખલ કરવામાં આવ્યો છે, જ્યાં તેની સારવાર ચાલી રહી છે.
આ અકસ્માતના ઘણા વીડિયો સોશિયલ મીડિયા પર વાયરલ થઈ રહ્યા છે. કેટલાક અહેવાલોમાં કહેવામાં આવ્યું છે કે સામેથી આવી રહેલી મર્સિડીઝે અક્ષય કુમારના કાફલાની કારને ટક્કર મારી, જેના કારણે આ અકસ્માત થયો. હાલ પોલીસ તે મર્સિડીઝના ડ્રાઈવરની પૂછપરછ કરી રહી છે.
વાયરલ વીડિયોમાં સ્પષ્ટપણે જોઈ શકાય છે કે અકસ્માત બાદ ચારેબાજુ અફરા-તફરી મચી ગઈ હતી. વીડિયોમાં એક વ્યક્તિ કારમાં ફસાયેલા સુરક્ષા કર્મચારીઓને પાણી આપી રહ્યો છે. વીડિયોમાં બે કાર પલટી ગયેલી જોવા મળી રહી છે. અન્ય એક વીડિયોમાં ડિઝાસ્ટર મેનેજમેન્ટના કર્મચારીઓ દોરડાની મદદથી પલટી ગયેલી કારને સીધી કરવાનો પ્રયાસ કરતા જોવા મળે છે.
