નવી દિલ્હી: ઈરાન યુદ્ધને કારણે વૈશ્વિક ઉર્જા પુરવઠા પર અસર થવાની આશંકા વચ્ચે ભારત પાસે હાલમાં ક્રૂડ ઓઈલ, પેટ્રોલ, ડીઝલ અને એલપીજીનો પૂરતો ભંડાર છે. આ ઉપરાંત, ઓઇલ કંપનીઓ પણ ગલ્ફ ક્ષેત્રની બહારના દેશોમાંથી આયાત વધારીને પુરવઠાની અછતની ભરપાઈ કરી રહી છે.
એક વરિષ્ઠ અધિકારીએ જણાવ્યું હતું કે હાલમાં ભારત ઊર્જા પુરવઠાના સંદર્ભમાં આરામદાયક સ્થિતિમાં છે. તેમણે કહ્યું કે અમારી પાસે હોર્મુઝ સ્ટ્રેટમાં ફસાયેલા ભંડાર કરતાં વધુ ઊર્જા સંસાધનો છે. તેમણે કહ્યું કે દેશમાં ક્રૂડ ઓઈલ, ઓઈલ પ્રોડક્ટ્સ અને એલપીજીનો પૂરતો સ્ટોક છે અને જો જરૂર પડશે તો અન્ય દેશોમાંથી આયાત વધારીને પુરવઠાની તંગીને પૂરી કરવામાં આવશે.
અધિકારીએ કહ્યું કે ભારત 2022થી રશિયા પાસેથી ક્રૂડ ઓઈલ ખરીદી રહ્યું છે. તે સમયે ભારતની કુલ આયાતમાં રશિયાનો હિસ્સો માત્ર 0.2 ટકા હતો. પરંતુ હવે તેમાં ઝડપથી વધારો થયો છે. તેમણે કહ્યું કે ભારતે ફેબ્રુઆરીમાં રશિયા પાસેથી તેની કુલ ક્રૂડ ઓઈલની આયાતમાંથી લગભગ 20 ટકા ખરીદી કરી હતી. ભારતે ફેબ્રુઆરીમાં રશિયા પાસેથી લગભગ 10.4 લાખ બેરલ પ્રતિ દિવસ (1.04 મિલિયન બેરલ પ્રતિ દિવસ) ક્રૂડ ઓઈલની આયાત કરી હતી.
સરકારી અધિકારીએ એ પણ સ્પષ્ટતા કરી કે MRPL રિફાઈનરી બંધ કરવાના અહેવાલો ખોટા છે. તેમણે કહ્યું કે રિફાઈનરીમાં પૂરતો સ્ટોક છે અને એલપીજીનું ઉત્પાદન કરતી તમામ રિફાઈનરીઓને ઉત્પાદન વધારવા માટે સૂચના આપવામાં આવી છે.
તેમણે કહ્યું કે હાલમાં દેશમાં એલપીજીનો પૂરતો સ્ટોક ઉપલબ્ધ છે, તેથી ગ્રાહકોને કોઈ અછતનો સામનો કરવો પડશે નહીં. અધિકારીએ કહ્યું કે સરકાર સ્થાનિક માંગને પહોંચી વળવા માટે જરૂર પડ્યે પેટ્રોકેમિકલ ઉત્પાદનોનો પણ ઉપયોગ કરશે, જેથી કોઈ પણ પ્રકારની અછત ન રહે.
મધ્ય પૂર્વમાં વધતા તણાવને ધ્યાનમાં રાખીને, પેટ્રોલિયમ અને કુદરતી ગેસ મંત્રાલય (MoPNG) એ ઓઇલ રિફાઇનરીઓને લિક્વિફાઇડ પેટ્રોલિયમ ગેસ (LPG) નું મહત્તમ ઉત્પાદન કરવા અને સ્થાનિક પુરવઠાને પ્રાથમિકતા આપવાનો નિર્દેશ આપ્યો છે.
