નવી દિલ્હીઃસોમવારે સાંજે દિલ્હીના લાલ કિલ્લા પાસે થયેલા વિસ્ફોટથી રાજધાની હચમચી ઉઠી છે. આ વિસ્ફોટમાં 8 લોકોના મોત થયા હતા અને ઘણા ઘાયલ થયા હતા.
હવે તપાસમાં સામે આવ્યું છે કે બ્લાસ્ટમાં વપરાયેલી કાર હરિયાણા નંબર i20 હતી, જે ગુરુગ્રામના રહેવાસી સલમાનના નામે રજીસ્ટર છે. રેડ ફોર્ટ મેટ્રો સ્ટેશન પાસે ટ્રાફિક સિગ્નલ પર વાહન ધીમેથી આગળ વધી રહ્યું હતું ત્યારે બ્લાસ્ટ થયો હતો.
સૂત્રોના જણાવ્યા અનુસાર વિસ્ફોટમાં વપરાયેલી i20 કારની નોંધણીની વિગતોથી જાણવા મળ્યું છે કે તે ગુરુગ્રામના સલમાન નામના વ્યક્તિના નામે નોંધાયેલ છે. પોલીસે કાર માલિક સલમાનની ધરપકડ કરી છે. પોલીસ સલમાનની પૂછપરછ કરી રહી છે. જો કે સલમાને કાર વેચી હોવાની માહિતી પણ મળી રહી છે. તપાસ ટીમો પણ છેલ્લા કેટલાક દિવસોમાં કારની મૂવમેન્ટ ટ્રેસ કરવામાં વ્યસ્ત છે જેથી તે જાણી શકાય કે કાર ક્યાં ગઈ હતી.
દિલ્હી પોલીસે આ મામલે હરિયાણા પોલીસનો સંપર્ક કર્યો છે. મળતી માહિતી મુજબ, એક વિશેષ ટીમ ગુરુગ્રામ જવા રવાના થઈ ગઈ છે. શરૂઆતમાં એવું કહેવામાં આવી રહ્યું હતું કે બ્લાસ્ટ ઈકો વેનમાં થયો હતો, પરંતુ બાદમાં એ વાતની પુષ્ટિ થઈ કે બ્લાસ્ટ i20 કારમાં થયો હતો. હાલ પોલીસ એ જાણવાનો પ્રયાસ કરી રહી છે કે કારમાં કયા વિસ્ફોટકનો ઉપયોગ કરવામાં આવ્યો હતો.
ઘટના સ્થળની આસપાસ લાગેલા સીસીટીવી કેમેરાના ફૂટેજની તપાસ કરવામાં આવી રહી છે. પોલીસ એ જાણવાની કોશિશ કરી રહી છે કે કાર કયા રસ્તેથી લાલ કિલ્લા વિસ્તારમાં પહોંચી અને તેની અંદર કોણ લોકો હતા. ફૂટેજમાં કેટલીક શંકાસ્પદ ગતિવિધિઓ દર્શાવવામાં આવી છે, જેને ઓળખવા માટે ફોરેન્સિક ટીમ ટેકનિકલ વિશ્લેષણ કરી રહી છે.
અમિત શાહે કહ્યું છે કે દરેક એંગલથી તપાસ કરવામાં આવી રહી છે અને ટૂંક સમયમાં સત્ય સામે આવશે. વિસ્ફોટ બાદ સમગ્ર દિલ્હીમાં સુરક્ષા વ્યવસ્થા કડક કરી દેવામાં આવી છે. લાલ કિલ્લો, મેટ્રો સ્ટેશન અને આઈજીઆઈ એરપોર્ટ સહિતના ભીડવાળા વિસ્તારોમાં હાઈ એલર્ટ ચાલુ છે. વિસ્ફોટ એટલો જોરદાર હતો કે નજીકમાં પાર્ક કરાયેલા ઘણા વાહનોમાં આગ લાગી ગઈ હતી અને કાચના ટુકડા થઈ ગયા હતા.
