નવી દિલ્હીઃ દિલ્હીમાં છઠ પર્વનો ઉત્સાહ જોઈને મુખ્યમંત્રી રેખા ગુપ્તાએ મહત્વનો નિર્ણય લીધો છે અને 27મીએ સોમવારને જાહેર રજા જાહેર કરી છે. આ રજા છઠ તહેવારના ત્રીજા અને સૌથી મહત્વપૂર્ણ દિવસ માટે જાહેર કરવામાં આવી છે. આ દિવસે દિલ્હી સરકાર હેઠળની તમામ સરકારી કચેરીઓ, શાળાઓ અને કોલેજો બંધ રહેશે.
મુખ્યમંત્રી કાર્યાલય દ્વારા જારી કરવામાં આવેલા એક સત્તાવાર નિવેદનમાં કહેવામાં આવ્યું છે કે છઠ તહેવારનો ત્રીજો દિવસ ખાસ કરીને મહત્વપૂર્ણ છે, કારણ કે આ દિવસે ભક્તો સૂર્યાસ્ત સમયે નદીઓ, તળાવો અથવા જળાશયોના કિનારે અસ્ત પામતા સૂર્યને અર્ધ્ય આપે છે. તેની તૈયારીઓ સવારથી જ શરૂ થઈ જાય છે, જેમાં પરિવારના તમામ સભ્યો વિવિધ ધાર્મિક અને પરંપરાગત પ્રવૃત્તિઓમાં વ્યસ્ત હોય છે.
ભક્તોને શુભેચ્છા પાઠવતા મુખ્યમંત્રીએ કહ્યું કે છઠ એ પ્રકૃતિને સમર્પિત તહેવાર છે, જેમાં લોકો સૂર્ય ભગવાન અને છઠ્ઠી મૈયાની પૂજા કરે છે. તેમણે કહ્યું કે ‘આ તહેવાર આસ્થા, ભક્તિ અને સ્વચ્છતાનું પણ પ્રતીક છે, જે પ્રકૃતિ, જળ અને સૂર્યની પૂજા દ્વારા પર્યાવરણ સંરક્ષણનો સંદેશ આપે છે.’
મુખ્યમંત્રીએ વધુમાં જણાવ્યું હતું કે, છઠ એ ભારતીય સંસ્કૃતિની લોકપ્રિય આસ્થા અને સમૃદ્ધ પરંપરાઓનો ઉત્સવ છે. આ સાથે તેમણે આશ્વાસન આપ્યું કે દિલ્હી સરકારે તમામ છઠ ઘાટ પર સ્વચ્છતા, સુરક્ષા અને તમામ જરૂરી સુવિધાઓ વિશે માહિતી લીધી છે.
