દિલ્હી હાઈકોર્ટે છેલ્લા 14 મહિનાથી UAE (સંયુક્ત આરબ અમીરાત)માં કસ્ટડીમાં રહેલા બોલિવૂડ અભિનેત્રી સેલિના જેટલીના ભાઈ નિવૃત્ત મેજર વિક્રાંત જેટલી સંબંધિત કેસમાં કડક વલણ અપનાવ્યું છે. મંગળવારે યોજાયેલી સુનાવણીમાં, કોર્ટે વિદેશ મંત્રાલય (MEA) ને મેજર વિક્રાંતનું પ્રતિનિધિત્વ કરવા માટે કાયદાકીય પેઢીની નિમણૂક માટે આદેશ જારી કરવાનો નિર્દેશ આપ્યો હતો. ન્યૂઝ એજન્સી ANI અનુસાર, જસ્ટિસ પુરૂષેન્દ્ર કુમાર કૌરવની બેંચે દુબઈ અને અબુ ધાબીમાં મેજર વિક્રાંત જેટલીનું પ્રતિનિધિત્વ કરવા માટે લો ફર્મ ‘અલ મેરી પાર્ટનર્સ’ની નિમણૂક કરવાનો નિર્દેશ આપ્યો છે.
આ ફર્મનું નામ સેલિના જેટલીના વકીલ રાઘવ કાકરે કોર્ટને સૂચવ્યું હતું, જેને એડવોકેટ માધવ અગ્રવાલ અને સુરાધિશ વત્સે મદદ કરી હતી. તેમણે કહ્યું કે આ લો ફર્મ મેજર વિક્રાંતનો કેસ સંપૂર્ણપણે મફતમાં લડવા માટે તૈયાર છે (પ્રો-બોનો). સાથે જ સુનાવણી દરમિયાન હાઈકોર્ટે કહ્યું કે જો આ આદેશ જારી કરવામાં કોઈ કાયદાકીય અવરોધ છે તો વિદેશ મંત્રાલયે એફિડેવિટ દ્વારા તેની સ્પષ્ટતા કરવી જોઈએ.
જોકે, સુનાવણી દરમિયાન વિદેશ મંત્રાલયના વકીલે આ દલીલોનો વિરોધ કર્યો હતો. મંત્રાલયની દલીલ એવી હતી કે વિક્રાંત જેટલીએ એમ્બેસીના અધિકારીઓને કહ્યું હતું કે કાનૂની પેઢીની નિમણૂક કરવાનો નિર્ણય તેમની પત્ની ચારુ જેટલી લેશે. બીજી તરફ સેલિના જેટલીના વકીલે આનો જોરદાર વિરોધ કર્યો અને કહ્યું કે મંત્રાલય તથ્યો છુપાવી રહ્યું છે. વકીલે દલીલ કરી હતી કે વિક્રાંત તેની પત્ની સાથે વાત પણ કરવા માંગતો ન હતો. આના પર કોર્ટે ટિપ્પણી કરી હતી કે, ‘જ્યારે પેઢી કોઈપણ ખર્ચ વિના પ્રતિનિધિત્વ આપવા માટે તૈયાર હોય, ત્યારે શું ફરક પડે છે કે નામ પિતા, માતા કે બહેન દ્વારા સૂચવવામાં આવ્યું છે.’
શું છે સમગ્ર મામલો?
અભિનેત્રીની અરજીમાં દાવો કરવામાં આવ્યો છે કે તેના ભાઈ મેજર (નિવૃત્ત) વિક્રાંત જેટલીનું સપ્ટેમ્બર 2024થી UAEમાં ગેરકાયદેસર રીતે અપહરણ કરીને અટકાયતમાં રાખવામાં આવ્યું છે. અરજીમાં આરોપ લગાવવામાં આવ્યો છે કે એક વર્ષથી વધુ સમય વીતી જવા છતાં પણ કેન્દ્ર સરકાર તેના ભાઈના સ્વાસ્થ્ય કે કાયદાકીય સ્થિતિ વિશે પ્રાથમિક માહિતી પણ મેળવી શકી નથી.
અગાઉ 3 નવેમ્બર, 2025 ના રોજ, કોર્ટે વિદેશ મંત્રાલયને વિક્રાંતને કાનૂની સહાય પૂરી પાડવા, ભાઈ અને બહેન વચ્ચે વાતચીતની સુવિધા આપવા અને આ કેસ માટે નોડલ અધિકારીની નિમણૂક કરવાનો નિર્દેશ આપ્યો હતો. હવે આ કેસની આગામી સુનાવણી 10 ફેબ્રુઆરી 2026ના રોજ થશે.
