બ્રિસ્બેનઃ ભારતીય મહિલા અને ઓસ્ટ્રેલિયન મહિલા ટીમ ત્રણ મેચની વનડે શ્રેણી મંગળવારથી શરૂ થઈ છે. બંને ટીમો વચ્ચે પ્રથમ મેચ બ્રિસ્બેનના ગાબામાં રમાઈ રહી છે. ઓસ્ટ્રેલિયાની ટીમને મોટો ઝટકો લાગ્યો છે. ઓલરાઉન્ડર એલિસ પેરી અને ઝડપી બોલર કિમ ગાર્થ ઈજાના કારણે આખી શ્રેણીમાંથી બહાર થઈ ગયા છે.
એલિસ પેરી અને કિમ ગાર્થ ક્વોડ ઈન્જરી (જાંઘના આગળના ભાગમાં સ્નાયુમાં તાણ)ને કારણે શ્રેણીમાંથી બહાર છે. ટેસ્ટ શ્રેણી માટે તેની ઉપલબ્ધતાનો નિર્ણય વનડે શ્રેણી બાદ તેના સ્વસ્થ થવાના આધારે કરવામાં આવશે. કિમ ગાર્થે સોમવારે સ્કેન કરાવ્યું હતું. જે બાદ મંગળવારે તેને સત્તાવાર રીતે ટીમમાંથી બહાર કરી દેવામાં આવ્યો હતો. કેપ્ટન એલિસા હીલીએ ટોસ દરમિયાન માહિતી આપી કે બંને ખેલાડીઓ ટીમની બહાર છે.
ભારતીય ટીમે ટોસ જીતીને બેટિંગ કરવાનો નિર્ણય લીધો છે. ટોસ સમયે ઓસ્ટ્રેલિયાના કેપ્ટન હીલીએ કહ્યું હતું કે પેરી અને ગાર્થ બંને રમી શકશે નહીં. ત્રીજી ટી20 મેચમાં તેને થોડી ઈજા થઈ હતી. તેમની જગ્યાએ મેગન શટ અને લુસી હેમિલ્ટનને વનડે ટીમમાં સામેલ કરવામાં આવ્યા છે. મેગન શટની ટીમમાં વાપસીથી ફાસ્ટ બોલિંગ વધુ મજબૂત બની છે.
સાત વખતના વિશ્વ કપ વિજેતા ઓસ્ટ્રેલિયા લાંબા સમયથી ODI ક્રિકેટમાં પ્રભુત્વ ધરાવે છે અને ભારત સામે તેનો રેકોર્ડ ઘણો મજબૂત છે. બીજી તરફ, ભારતીય ટીમ, નવેમ્બર 2025માં મહિલા ODI વર્લ્ડ કપ જીત્યા બાદ તેની પ્રથમ ODI રમી રહી છે, તે ODIમાં પણ T20 ઇન્ટરનેશનલમાં મેળવેલ આત્મવિશ્વાસ જાળવી રાખવાનો પ્રયાસ કરશે.
તમને જણાવી દઈએ કે ગાબામાં રમાનારી પ્રથમ વનડે મેચ આ શ્રેણીનો મૂડ નક્કી કરશે. ભારતીય ટીમ પાસે ઈતિહાસ રચવાની તક છે. ભારતીય ટીમે ઓસ્ટ્રેલિયાને હરાવીને T20 સિરીઝ જીતી લીધી છે. હવે જો ભારત વનડે સીરીઝ જીતવામાં સફળ થશે તો હરમનપ્રીત કૌરની કેપ્ટનશીપમાં ટીમ એક રેકોર્ડ બનાવશે.
