બાબર આઝમ પાકિસ્તાનના સ્ટાર બેટ્સમેન બાબર આઝમને શ્રીલંકા સામેની ત્રીજી વનડેમાં નારાજગી વ્યક્ત કરવા બદલ ICCની આચાર સંહિતાના લેવલ-1 ભંગનો દોષી ઠેરવવામાં આવ્યો છે. તેના પર તેની મેચ ફીના 10% દંડ ફટકારવામાં આવ્યો છે અને તેના અનુશાસનાત્મક રેકોર્ડમાં એક ડીમેરિટ પોઈન્ટ પણ જોડવામાં આવ્યો છે.
આ ઘટના 16 નવેમ્બરે રાવલપિંડીમાં રમાયેલી મેચ દરમિયાન બની હતી. પાકિસ્તાની ઈનિંગ્સની 21મી ઓવરમાં આઉટ થયા બાદ તરત જ બાબરે ગુસ્સામાં બેટ વડે સ્ટમ્પ પર ફટકાર્યો અને પછી ડગઆઉટ તરફ ગયો. આ કાર્યવાહી ICC આચાર સંહિતાની કલમ 2.2 હેઠળ “આંતરરાષ્ટ્રીય મેચ દરમિયાન ક્રિકેટ સાધનો/કપડાં, ફિલ્ડ સાધનો અને ફિટિંગનો દુરુપયોગ” ની શ્રેણી હેઠળ આવે છે.
ઓન-ફિલ્ડ અમ્પાયર એલેક્સ વ્હાર્ફે અને રાશિદ રિયાઝે તરત જ બાબર પર આરોપ મૂક્યો હતો, જેને ત્રીજા અને ચોથા અમ્પાયરોએ પણ સમર્થન આપ્યું હતું. મેચ રેફરી અલી નકવી (અમિરાત ICC પેનલ) એ પ્રસ્તાવિત સજાને મંજૂરી આપી હતી. બાબરે ગુનો અને સજા બંને સ્વીકારી લીધા હતા, તેથી ટ્રાયલની જરૂર નહોતી. છેલ્લા 24 મહિનામાં બાબરનો આ પહેલો ડીમેરિટ પોઈન્ટ છે.
મેચની વાત કરીએ તો પાકિસ્તાને આ મેચ 6 વિકેટથી જીતીને સિરીઝમાં 2-1થી લીડ મેળવી લીધી હતી. પ્રથમ બેટિંગ કરતા શ્રીલંકાની ટીમ 45.2 ઓવરમાં 211 રનમાં ઓલઆઉટ થઈ ગઈ હતી. સાદિરા સમરવિક્રમા (48) સૌથી વધુ સ્કોરર રહી હતી. પાકિસ્તાન તરફથી મોહમ્મદ વસીમ જુનિયરે 3 જ્યારે હરિસ રઉફ અને ફૈઝલ અકરમે 2-2 વિકેટ ઝડપી હતી.
જવાબમાં પાકિસ્તાને માત્ર 44.4 ઓવરમાં જ ટાર્ગેટ હાંસલ કરી લીધો હતો. મોહમ્મદ રિઝવાન (61), ફખર ઝમાન (55) અને હુસૈન તલત (અણનમ 42)એ મહત્વની ઈનિંગ્સ રમી હતી. શ્રીલંકા તરફથી જેફ્રી વેન્ડરસે સૌથી સફળ બોલર રહ્યો, તેણે 3 વિકેટ લીધી. બાબર તે મેચમાં માત્ર 7 રન બનાવીને આઉટ થયો હતો, કદાચ આ જ કારણ હતું કે તે આટલો નિરાશ દેખાતો હતો.
