અલગતાવાદી સંગઠન બલૂચ લિબરેશન આર્મી (BLA) એ પાકિસ્તાન સરકારના બેવડા ધોરણો અને કુદરતી સંસાધનોના શોષણ સામે શાહબાઝ શરીફ સરકારને સાત દિવસનું અલ્ટીમેટમ આપ્યું છે. BLAએ દાવો કર્યો છે કે પાકિસ્તાની સુરક્ષા દળોના ઓછામાં ઓછા સાત સૈનિક તેમની કસ્ટડીમાં છે. જો એક અઠવાડિયામાં મંત્રણા નહીં થાય અને બલૂચ નેતાઓને છોડવામાં નહીં આવે તો પકડાયેલા સૈનિકોને મારી નાખવામાં આવશે.
BLAની મીડિયા વિંગ હક્કલ દ્વારા જારી કરવામાં આવેલા નિવેદનમાં કહેવામાં આવ્યું છે કે સરકાર પાસે હવે માત્ર છ દિવસ બાકી છે. હક્કલે એક વીડિયો સંદેશ જાહેર કર્યો છે. એવો દાવો કરવામાં આવ્યો છે કે સરકાર તરફથી તાત્કાલિક કોઈ જવાબ મળ્યો નથી. BLAએ કહ્યું છે કે આ સૈનિકોને ઓપરેશન હેરોફના બીજા તબક્કા હેઠળ પકડવામાં આવ્યા છે. આ તમામ પાકિસ્તાનના સૈનિકો છે અને તેમને અલગ-અલગ કામ માટે મોકલવામાં આવ્યા હતા.
BLAએ જણાવ્યું હતું કે 10 લોકોને મુક્ત કરવામાં આવ્યા હતા કારણ કે તેઓ વંશીય બલૂચ જૂથ અથવા સ્થાનિક પોલીસ સાથે સંબંધ ધરાવતા હતા. BLAએ કહ્યું કે જમીની વાસ્તવિકતાના આધારે બલોચની ઓળખ અને હિતોની સાથે કોઈ સમજૂતી કરવામાં આવશે નહીં. તેથી પાકિસ્તાન સરકારે આ બાબતે ગંભીરતાથી ચર્ચા કરવી જોઈએ.
અગાઉ 26 જાન્યુઆરીએ પાકિસ્તાન સરકારે બલૂચિસ્તાનમાં ઓપરેશન શરૂ કર્યું હતું. પાકિસ્તાની સેનાએ કહ્યું કે વિશ્વસનીય અને ગુપ્ત માહિતીના આધારે આતંકવાદીઓની હાજરીની પુષ્ટિ કર્યા પછી, પંજગુર અને હરનાઈ જિલ્લાની બહારના વિસ્તારોમાં ઓપરેશન શરૂ કરવામાં આવ્યું હતું.
