‘બિગ બોસ 19’ની સ્પર્ધકો ફરહાના ભટ્ટ અને અમલ મલિક ઘરની અંદર લડી રહ્યાં છે. તેના પરિવારના સભ્યો બહાર લડી રહ્યા છે. સમાચાર આવી રહ્યા છે કે ફરહાના ભટ્ટના પરિવારે અમલ મલિકની કાકી રોશન ગેરી ભિંડર, યુટ્યુબ ચેનલ ફિફાફુઝ અને યુટ્યુબ ઈન્ડિયા સામે માનહાનિનો કેસ દાખલ કર્યો છે. વાસ્તવમાં રોશન ગેરી ભિંડરે ફિફાફુઝને આપેલા ઈન્ટરવ્યુમાં ફરહાનાને ‘આતંકવાદી’ કહીને સંબોધી હતી.
ફરહાનાના પરિવારે સોશિયલ મીડિયા પર એક નિવેદન જારી કરીને કહ્યું કે આ વીડિયોમાં ખોટા, ભડકાઉ અને ઈમેજ બદનામ કરવાના આરોપો લગાવવામાં આવ્યા છે. પરિવારે કહ્યું કે તેઓ આ આરોપોનો કાનૂની અને માનનીય રીતે જવાબ આપશે, અને મીડિયા અને લોકોને આવી નકલી અને દ્વેષપૂર્ણ સામગ્રી શેર ન કરવાની અપીલ પણ કરી છે.
ફરિયાદમાં 1 કરોડ રૂપિયાના વળતરની માગણી કરવામાં આવી છે. વિવાદાસ્પદ વીડિયોને તાત્કાલિક દૂર કરવા, જાહેરમાં માફી માંગવા અને ભવિષ્યમાં આવી ખોટી માહિતી ફેલાવવાનું બંધ કરવાની પણ માંગ કરવામાં આવી છે. આ નોટિસ રોશન ગેરી ભિંડર, ફિફાફુઝ ચેનલ અને યુટ્યુબ ઈન્ડિયાને મોકલવામાં આવી છે. આ ઉપરાંત તપાસ માટે રાષ્ટ્રીય મહિલા આયોગ અને મહારાષ્ટ્ર મહિલા આયોગને પણ એક નકલ મોકલવામાં આવી છે.
ફરહાના ભટ્ટ હાલમાં ‘બિગ બોસ 19’ ના ઘરની અંદર છે પરંતુ બહાર તેનો પરિવાર આ સમગ્ર મામલાને ગંભીરતાથી સંભાળી રહ્યો છે અને તેને સંપૂર્ણ સમર્થન આપી રહી છે.
