પટના:બિહાર વિધાનસભા ચૂંટણી પ્રચાર વચ્ચે કોંગ્રેસ સાંસદ રાહુલ ગાંધીના નિવેદનથી નવો વિવાદ સર્જાયો છે. બિહારના મુઝફ્ફરપુર અને દરભંગામાં આયોજિત રેલીઓ દરમિયાન રાહુલ ગાંધીએ વડાપ્રધાન નરેન્દ્ર મોદી પર નિશાન સાધતા કહ્યું કે ‘જો વોટ માંગશો તો મોદી ડાન્સ કરશે.’
ભારતીય જનતા પાર્ટી (BJP)એ આ નિવેદન સામે સખત વાંધો વ્યક્ત કર્યો છે અને રાહુલ ગાંધી પર આદર્શ આચાર સંહિતાનું ઉલ્લંઘન કરવાનો આરોપ લગાવીને બિહારના મુખ્ય ચૂંટણી અધિકારી (CEO) પાસે ફરિયાદ નોંધાવી છે.
ભારતીય જનતા પાર્ટીએ ગુરુવારે બિહારના મુખ્ય ચૂંટણી અધિકારીને રાહુલ ગાંધી વિરુદ્ધ સત્તાવાર ફરિયાદ નોંધાવી છે. ફરિયાદમાં કહેવામાં આવ્યું છે કે કોંગ્રેસના સાંસદે વડાપ્રધાન નરેન્દ્ર મોદી વિરુદ્ધ ‘અત્યંત અપમાનજનક, અભદ્ર અને અંગત ટિપ્પણીઓ’ કરી છે. પાર્ટીનું કહેવું છે કે આ ટિપ્પણી વડાપ્રધાન પદની ગરિમાને ઠેસ પહોંચાડે છે અને લોકતાંત્રિક સંવાદની હદ વટાવે છે.
ભાજપની ફરિયાદમાં કહેવામાં આવ્યું છે કે રાહુલ ગાંધીનું આ નિવેદન માત્ર વડાપ્રધાનના અંગત ચારિત્ર્ય પર હુમલો નથી પરંતુ આદર્શ આચાર સંહિતાનું પણ સ્પષ્ટ ઉલ્લંઘન છે. પક્ષે દાવો કર્યો હતો કે આ નિવેદન જનતાને ગેરમાર્ગે દોરવા અને રાજકીય વિરોધીની છબીને કલંકિત કરવાના ઈરાદાથી કરવામાં આવ્યું હતું, જે લોકોના પ્રતિનિધિત્વ અધિનિયમ 1951ની કલમ 123(4) હેઠળ ‘ભ્રષ્ટ આચરણ’ની શ્રેણીમાં આવે છે.
ભાજપે ચૂંટણી પંચ પાસે રાહુલ ગાંધી સામે તાત્કાલિક અને અનુકરણીય પગલાં લેવાની માંગ કરી છે. પાર્ટી ઇચ્છે છે કે રાહુલને નોટિસ જારી કરવામાં આવે અને જાહેરમાં માફી માંગવા કહેવામાં આવે અને તેમના પર થોડા સમય માટે પ્રચાર પર પ્રતિબંધ મુકવામાં આવે. પાર્ટીનું કહેવું છે કે ચૂંટણીની રાજનીતિમાં વધતા વ્યક્તિગત હુમલાઓને રોકવા અને લોકતાંત્રિક ગરિમાને બચાવવા માટે આ પગલું જરૂરી છે.
રાહુલ ગાંધીના આ નિવેદન બાદ સત્તાધારી ભાજપ અને કોંગ્રેસ વચ્ચે બયાનબાજી તેજ થઈ ગઈ છે. ભાજપે તેને ‘લોકતાંત્રિક શિષ્ટાચારનું પતન’ ગણાવ્યું, જ્યારે કોંગ્રેસે કહ્યું કે રાહુલ ગાંધીએ માત્ર રાજકીય વ્યંગ કર્યો છે. તે જ સમયે, રાજકીય વિશ્લેષકોનું કહેવું છે કે આવા નિવેદનો ચૂંટણી વાતાવરણને વધુ તંગ બનાવે છે અને રાજકીય સંવાદની ગુણવત્તા પર સવાલો ઉભા કરે છે.
