આજે બજાર કેમ નીચે છે:સોમવારે ભારતીય શેરબજારમાં જોરદાર ઘટાડો જોવા મળ્યો હતો. પશ્ચિમ એશિયામાં વધતા તણાવને કારણે રોકાણકારોએ ભારે વેચવાલી કરી હતી. શરૂઆતના કારોબારમાં, BSE સેન્સેક્સ 1,609.95 પોઈન્ટ ઘટીને 72,923.01 પર જ્યારે NSE નિફ્ટી 515.2 પોઈન્ટ ઘટીને 22,599.30 પર છે.
બજારના આ તીવ્ર ઘટાડામાં મોટા શેરોને સૌથી વધુ નુકસાન થયું છે. HDFC બેન્ક, સ્ટેટ બેન્ક ઓફ ઇન્ડિયા, ICICI બેન્ક, ભારતી એરટેલ, લાર્સન એન્ડ ટુબ્રો, બજાજ ફાઇનાન્સ, મહિન્દ્રા એન્ડ મહિન્દ્રા, ટાટા સ્ટીલ, એક્સિસ બેન્ક, રિલાયન્સ ઇન્ડસ્ટ્રીઝ, ITC અને ટાઇટન જેવા મોટા શેરોમાં વેચવાલીનું વર્ચસ્વ હતું. આ શેરોના દબાણે બંને મુખ્ય સૂચકાંકો નીચે ખેંચ્યા હતા.
મિડકેપ અને સ્મોલકેપમાં પણ ઘટાડો નોંધાયો હતો
ઘટાડો માત્ર મોટા શેરો પૂરતો મર્યાદિત નહોતો. બ્રોડર માર્કેટમાં પણ નબળાઈ જોવા મળી હતી. નિફ્ટી મિડકેપ 100 ઇન્ડેક્સ 2.82% અને નિફ્ટી સ્મોલકેપ 100 લગભગ 3% લપસ્યો. આનાથી સ્પષ્ટ થાય છે કે બજારમાં દરેક જગ્યાએ દબાણ છે.
રોકાણકારોની સંપત્તિમાં મોટું નુકસાન
આ ઘટાડાની સીધી અસર રોકાણકારોની સંપત્તિ પર પડી હતી. પ્રારંભિક ટ્રેડિંગમાં જ રોકાણકારોની રૂ. 10.7 લાખ કરોડની સંપત્તિનો નાશ થયો હતો. BSE પર લિસ્ટેડ કંપનીઓનું કુલ માર્કેટ કેપ રૂ. 429.11 લાખ કરોડથી ઘટીને રૂ. 418.35 લાખ કરોડ થયું છે.
નબળા માર્કેટબ્રેડ્થને કારણે ચિંતા વધી છે
માર્કેટ બ્રેડ્થ પણ ઘણી નબળી રહી હતી. કુલ 3,855 શૅર્સમાંથી 3,053 શૅર્સ ઘટયા હતા, જ્યારે માત્ર 619 શૅર્સ વધ્યા હતા. આ આંકડો સ્પષ્ટપણે વેચાણની તીવ્રતા દર્શાવે છે.
