ચીનના સિચુઆનની કેટલીક સેટેલાઇટ તસવીરોએ ભારતનો તણાવ વધારી દીધો છે. 2022 થી 2026 સુધીની સેટેલાઇટ તસવીરોના અભ્યાસમાં સામે આવ્યું છે કે ચીને સિચુઆન પ્રાંતમાં ગુપ્ત રીતે પરમાણુ શસ્ત્રોના અડ્ડા બનાવ્યા છે. ન્યૂયોર્ક ટાઈમ્સના રિપોર્ટમાં આ દાવો કરવામાં આવ્યો છે. જીઓસ્પેશિયલ ઇન્ટેલિજન્સ નિષ્ણાતોના જણાવ્યા અનુસાર, 2019 થી, ચીને પરમાણુ શસ્ત્રોને લઈને તેનું અભિયાન તેજ કર્યું છે.
ચીને સિચુઆનમાં જિટોંગ નામના સ્થળે ખીણોની વચ્ચે વિશાળ બંકર બનાવ્યા છે. અહીં પાઈપનું નેટવર્ક બિછાવવામાં આવ્યું છે. નિષ્ણાંતોનું કહેવું છે કે અહીં પહાડો ખોદીને પરમાણુ મથકો બનાવવામાં આવ્યા છે. તમને જણાવી દઈએ કે દુનિયાભરમાં પરમાણુ હથિયારોને લઈને તણાવ પહેલા કરતા ઓછો નથી. આ મુદ્દે અમેરિકા અને ઈરાન આમને-સામને ઉભા છે અને અમેરિકા સીધેસીધી ધમકી આપી રહ્યું છે કે જો ઈરાન સાથે ડીલ નહીં થાય તો હુમલો કરશે. બીજી તરફ ચીનનું આ પરમાણુ અભિયાન માત્ર બોજ જ નહીં પરંતુ સમગ્ર વિશ્વ માટે ચિંતાનો વિષય છે.
ન્યૂયોર્ક ટાઈમ્સ દ્વારા જાહેર કરવામાં આવેલી તસવીરો અનુસાર ચીન સતત પોતાની વ્યૂહાત્મક સ્થિતિને મજબૂત કરી રહ્યું છે. અમેરિકાએ 2020માં જ દાવો કર્યો હતો કે ચીન ગુપ્ત રીતે પરમાણુ પરીક્ષણ કરી રહ્યું છે. ડોનાલ્ડ ટ્રમ્પનું કહેવું છે કે ચીન અને રશિયાએ સાથે મળીને અમેરિકા સાથે પરમાણુ હથિયારનો કરાર કરવો જોઈએ. અમેરિકાએ કહ્યું છે કે અમેરિકા અને રશિયા વચ્ચે પરમાણુ આર્મ્સ કંટ્રોલ પેક્ટ સમાપ્ત થઈ ગયો છે અને તેથી ચીને ભવિષ્યના કરારનો ભાગ બનવું જોઈએ.
પેન્ટાગોનના અનુમાન મુજબ, 2024ના અંત સુધીમાં ચીન પાસે 500 થી વધુ પરમાણુ હથિયારો હોઈ શકે છે. 2030 સુધીમાં આ આંકડો વધારીને 1 હજાર કરવાનો લક્ષ્યાંક છે. જો કે, અત્યારે ચીન રશિયા અને અમેરિકાથી ઘણું પાછળ છે અને તે આગામી 10 વર્ષમાં પણ રશિયા સાથે સ્પર્ધા કરી શકશે નહીં.
