કોમેડિયન કલાકાર કુણાલ કામરાએ હાલમાં જ એક નવો વિવાદ સર્જ્યો છે. તેમનું એક ટી-શર્ટ વિવાદનું કારણ બની ગયું છે. વાસ્તવમાં, કામરાએ હાલમાં જ સોશિયલ મીડિયા પ્લેટફોર્મ પર પોતાનો એક ફોટો પોસ્ટ કર્યો છે, મામલો પ્રકાશમાં આવતાની સાથે જ ભાજપ ગુસ્સે થઈ ગયો હતો અને પાર્ટીએ મંગળવારે કુણાલ કામરાને કડક ચેતવણી આપી હતી.
મહારાષ્ટ્રના મંત્રી અને બીજેપીના વરિષ્ઠ નેતા ચંદ્રશેખર બાવનકુલેએ ચેતવણી આપી છે કે ‘વાંધાજનક’ સામગ્રી ઓનલાઈન પોસ્ટ કરનારાઓ સામે પોલીસ કાર્યવાહી કરશે. બાવનકુળેએ જણાવ્યું હતું કે, “આ પ્રકારની વાંધાજનક પોસ્ટ શેર કરનાર કોઈપણ સામે પોલીસ કાર્યવાહી કરશે.” બાવનકુલે સોમવારે કામરાની સોશિયલ મીડિયા પોસ્ટ પર પ્રતિક્રિયા આપી રહ્યા હતા, જેમાં કૂતરાની છબીવાળી ટી-શર્ટ સાથે આરએસએસનો સંદર્ભ આપવામાં આવ્યો હતો.
મહારાષ્ટ્રની મહાયુતિ સરકારમાં સહયોગી શિવસેનાના નેતા અને મંત્રી સંજય શિરસાટે પણ આ મામલે પ્રતિક્રિયા આપી છે. તેમણે કહ્યું છે કે શાસક ગઠબંધને કોમેડિયનની વિવાદાસ્પદ પોસ્ટ સામે કડક પગલાં લેવાની જરૂર છે. શિરસાટે કહ્યું કે કામરાએ અગાઉ પણ વડા પ્રધાન મોદી અને મહારાષ્ટ્રના નાયબ મુખ્ય પ્રધાન એકનાથ શિંદે વિરુદ્ધ અભદ્ર ટિપ્પણીઓ કરી હતી.
કામરાનું વિવાદો સાથે જૂનું જોડાણ
અગાઉ માર્ચમાં પણ કુણાલ કામરા વિવાદોમાં ફસાયા હતા. તેમણે શિવસેના પ્રમુખ એકનાથ શિંદે વિરુદ્ધ અપમાનજનક શબ્દોનો ઉપયોગ કર્યો હતો. 36 વર્ષીય હાસ્ય કલાકારે ત્યારબાદ તેમના શોમાં એક પ્રખ્યાત હિન્દી ફિલ્મના ગીતના બોલ બદલીને શિંદેની રાજકીય કારકિર્દીની મજાક ઉડાવી હતી. આ પછી ગુસ્સે ભરાયેલા શિવસૈનિકોએ મુંબઈના ખારમાં હેબિટેટ કોમેડી ક્લબ તેમજ કામરાનો શો જ્યાં યોજાયો હતો તે હોટેલમાં તોડફોડ કરી હતી.
