કર્ણાટક સરકારે એમ ચિન્નાસ્વામી સ્ટેડિયમમાં મેચ આયોજિત કરવાની મંજૂરી આપી દીધી છે અને ભારતીય ક્રિકેટ કંટ્રોલ બોર્ડને પણ આ અંગે જાણ કરવામાં આવી છે. વેંકટેશ પ્રસાદ કર્ણાટક સ્ટેટ ક્રિકેટ એસોસિએશનના પ્રમુખ બન્યા તેના એક સપ્તાહ બાદ આ પરવાનગી મળી છે. પ્રસાદ અને ડેપ્યુટી સ્પીકર સુજીત સોમસુંદર આ અઠવાડિયાની શરૂઆતમાં બેલાગવીમાં રાજ્ય વિધાનસભા સત્ર દરમિયાન મુખ્ય પ્રધાન સિદ્ધારમૈયા, નાયબ મુખ્ય પ્રધાન ડીકે શિવકુમાર અને અન્ય સરકારી અધિકારીઓને મળ્યા હતા. કહેવામાં આવી રહ્યું છે કે આ બેઠક ફળદાયી રહી.
આ નિર્ણયનું તાત્કાલિક પરિણામ એ આવશે કે વિરાટ કોહલી ચિન્નાસ્વામીમાં રમી શકશે કારણ કે કેએસસીએ સુરક્ષા અને લોજિસ્ટિક કારણોસર દિલ્હીની મેચોને અલૂરથી અહીં શિફ્ટ કરવાનું વિચારી રહી છે. કોહલી અને રિષભ પંત બંને વિજય હજારે ટ્રોફી માટે દિલ્હીની ટીમનો ભાગ છે અને પ્રથમ ત્રણ મેચ માટે ઉપલબ્ધ હોઈ શકે છે.
ભારતના બે મોટા ખેલાડીઓ રમે તેવી શક્યતાને ધ્યાનમાં રાખીને કેએસસીએ ચિન્નાસ્વામીના કેટલાક સ્ટેન્ડ ચાહકો માટે ખોલવાનું પણ વિચારી રહી છે જેથી કરીને બે હજારથી ત્રણ હજાર પ્રશંસકો રમત નિહાળી શકે તેવી વ્યવસ્થા કરી શકાય.
સરકારી અધિકારીઓ સાથેની બેઠકમાં, પ્રસાદની આગેવાની હેઠળની KSCA સમિતિએ ન્યાયમૂર્તિ જ્હોન ડીકુન્હાના અહેવાલમાંથી શક્ય તેટલા ફેરફારો લાગુ કરવાની તેની પ્રતિબદ્ધતાનો પુનરોચ્ચાર કર્યો. વિજય હજારે ટ્રોફી મેચોની યજમાનીને પ્રારંભિક પગલા તરીકે જોવામાં આવી રહી છે કારણ કે પ્રસાદ અને KSCA એ સુનિશ્ચિત કરવા માંગે છે કે ચિન્નાસ્વામી IPL ફિક્સ્ચરના આયોજનથી વંચિત ન રહે.
વિકાસથી વાકેફ એક અધિકારીએ જણાવ્યું હતું કે, અમે IPLની વાપસી તરફ સાચા માર્ગ પર છીએ. શુક્રવારે રાજ્ય સરકારની કેબિનેટની બેઠક પછી, નાયબ મુખ્ય પ્રધાન શિવકુમારે જણાવ્યું હતું કે, “ભવિષ્યમાં કોઈ પણ ઘટનાને ટાળવા માટે અમે સાવચેતીનાં પગલાં લીધાં છે અને અમે તે મુજબ પરવાનગી આપી છે. ગૃહ પ્રધાન જી પરમેશ્વરા KSCA પ્રમુખ અને પોલીસ અધિકારીઓ સાથે ચર્ચા કરશે.”
