ન્યૂઝીલેન્ડના સ્ટાર ઓલરાઉન્ડર ડેરીલ મિશેલે રવિવારે 6000 આંતરરાષ્ટ્રીય રન પૂરા કર્યા. મિશેલે વેસ્ટ ઈન્ડિઝ સામેની ત્રીજી T20 મેચ દરમિયાન આ સિદ્ધિ મેળવી હતી. ત્રીજી મેચમાં તેણે 24 બોલમાં 41 રનની જોરદાર ઇનિંગ રમી હતી. આ દરમિયાન તેણે બે ચોગ્ગા અને ત્રણ છગ્ગા ફટકાર્યા હતા. ન્યૂઝીલેન્ડે રોમાંચક ત્રીજી T20 મેચમાં વેસ્ટ ઈન્ડિઝ સામે નવ રને જીત નોંધાવી હતી. આ સાથે ન્યૂઝીલેન્ડે પાંચ મેચની શ્રેણીમાં 2-1ની સરસાઈ મેળવી લીધી છે. ઈશ સોઢીને ‘પ્લેયર ઓફ ધ મેચ’નો એવોર્ડ મળ્યો હતો.
ડેરીલ મિશેલે 175 આંતરરાષ્ટ્રીય મેચોમાં 39.42ની એવરેજથી 6032 રન બનાવ્યા છે. તેણે 11 સદી અને 34 અડધી સદી ફટકારી છે. તેણે 26 વિકેટ લીધી છે. 88 T20 મેચોમાં મિશેલે 27ની એવરેજથી 1674 રન બનાવ્યા છે. તેણે 80 ઇનિંગ્સમાં આઠ અડધી સદી ફટકારી છે. તેનો સર્વશ્રેષ્ઠ સ્કોર અણનમ 72 રન છે. મિશેલે 55 મેચમાં 51.60ની એવરેજથી 2219 રન બનાવ્યા છે. તેણે 33 ટેસ્ટમાં 2139 રન બનાવ્યા હતા. તેણે પાંચ સદી અને 15 અડધી સદી ફટકારી હતી.
ન્યુઝીલેન્ડ તરફથી કેન વિલિયમસન સૌથી વધુ રન બનાવનાર બેટ્સમેન છે. તેણે 373 મેચમાં 48.37ની એવરેજથી 19,107 રન બનાવ્યા છે, જેમાં 443 ઈનિંગ્સમાં 48 સદી અને 102 અડધી સદી સામેલ છે અને તેનો સર્વશ્રેષ્ઠ સ્કોર 251 છે. મેચની વાત કરીએ તો ગુરુવારે બીજી મેચમાં જેમિસને છેલ્લી ઓવર ફેંકી હતી જે ન્યૂઝીલેન્ડે ત્રણ રને જીતી લીધી હતી. વેસ્ટ ઈન્ડિઝે પ્રથમ મેચ સાત રને જીતી હતી. ત્રણેય મેચનો નિર્ણય છેલ્લી ઓવરમાં થઈ ગયો છે.
ન્યૂઝીલેન્ડે ટોસ જીતીને પ્રથમ બેટિંગ કરીને નવ વિકેટે 177 રન બનાવ્યા હતા. તે પછી, લક્ષ્યનો પીછો કરતી વખતે વેસ્ટ ઈન્ડિઝે 13મી ઓવરમાં 88 રનમાં આઠ વિકેટ ગુમાવી દીધી હતી, જેના કારણે એવું લાગી રહ્યું હતું કે ન્યૂઝીલેન્ડ સરળતાથી જીતી જશે. પરંતુ રોમારિયો શેફર્ડે 34 બોલમાં 49 રન અને શમર સ્પ્રિંગરે 20 બોલમાં 39 રન ફટકાર્યા હતા. જેના કારણે છેલ્લી ઓવરમાં વેસ્ટ ઈન્ડિઝને જીતવા માટે 14 રનની જરૂર હતી. શેફર્ડ અને અકેલ હોસીન ક્રિઝ પર હતા.
