સ્ટાર બેટ્સમેન ધ્રુવ જુરેલે સાઉથ આફ્રિકા A વિરૂદ્ધ ચાર દિવસીય મેચના ત્રીજા દિવસે સાઉથ આફ્રિકા A વિરૂદ્ધ બીજા દાવમાં સતત બીજી સદી ફટકારી હતી.આ સાથે તેણે એક મોટી સિદ્ધિ હાંસલ કરી છે. તે ‘A-ટેસ્ટ’ મેચની બંને ઇનિંગ્સમાં સદી ફટકારનાર ઇતિહાસમાં માત્ર બીજો ભારતીય બેટ્સમેન બન્યો છે. આ પહેલા માત્ર નમન ઓઝા જ આ સિદ્ધિ મેળવી શક્યો હતો. જુરેલે પ્રથમ દાવમાં સદી ફટકારી હતી અને હવે તેણે બીજી ઈનિંગમાં પણ શાનદાર બેટિંગ ચાલુ રાખી અને બીજી સદી પૂરી કરી. જુરેલની સદીને કારણે, ભારત A એ આફ્રિકા A સામે મજબૂત પકડ બનાવી છે. જુરેલે ઝડપી બોલર તિયાન વેન વ્યુરેનના ફ્લિક શોટ સાથે 159 બોલમાં તેની 14મી ફર્સ્ટ ક્લાસ સદી પૂરી કરી.
ધ્રુવ જુરેલે સળંગ બે સદી સાથે મેચમાં ભારત ‘A’ને માત્ર મજબૂત સ્થિતિમાં મુકી નથી, પરંતુ સિનિયર ભારતીય ટેસ્ટ ટીમમાં સામેલ કરવા માટે રાષ્ટ્રીય પસંદગીકારો સમક્ષ મજબૂત કેસ પણ રજૂ કર્યો છે. ધ્રુવ જુરેલે પ્રથમ દાવમાં 175 બોલમાં 132 રનની ઇનિંગ રમી હતી. તે અણનમ પરત ફર્યો. બીજા દાવમાં જુરેલે 170 બોલમાં 127 રન બનાવ્યા અને અહીં પણ તે અણનમ રહ્યો. આ પહેલા જુલાઈ 2014માં નમન ઓઝાએ ઓસ્ટ્રેલિયા A વિરૂદ્ધ અણનમ 219 અને અણનમ 109 રનની ઇનિંગ્સ રમી હતી.
જુરેલ (અણનમ 127) એ છઠ્ઠી વિકેટ માટે હર્ષ દુબે (84) સાથે 184 રનની ભાગીદારી કરી, જેના કારણે ભારત A એ તેનો બીજો દાવ સાત વિકેટે 382 રન પર જાહેર કરીને ટીમની કુલ લીડ 416 રન સુધી લઈ લીધી. સાઉથ આફ્રિકા A એ સ્ટમ્પના સમયે વિના નુકસાન 25 રન બનાવ્યા હતા. તેને જીતવા માટે વધુ 392 રનની જરૂર છે. સ્ટમ્પના સમયે લેસેગો સેનોકવાને (નવ) અને જોર્ડન હરમન (15) ક્રિઝ પર હતા. વેસ્ટ ઈન્ડિઝ સામેની ભારતની છેલ્લી ટેસ્ટ શ્રેણીમાં, જુરેલે નિયમિત વિકેટકીપર ઋષભ પંતની ઈજાને કારણે ટીમમાં આ ભૂમિકા ભજવી હતી અને બીજી ટેસ્ટમાં સદી ફટકારી હતી.
