અમેરિકી રાષ્ટ્રપતિ ડોનાલ્ડ ટ્રમ્પે હાલમાં જ સોશિયલ મીડિયા પર પોતાની એક તસવીર શેર કરી છે જેને લઈને ચર્ચાઓ શરૂ થઈ ગઈ છે. વેનેઝુએલા પર હુમલા અને રાષ્ટ્રપતિ નિકોલસ માદુરોની ધરપકડ બાદ ટ્રમ્પે હવે પોતાને તે દેશના ‘કાર્યવાહક રાષ્ટ્રપતિ’ જાહેર કર્યા છે. ટ્રમ્પે આ તસવીરને કટાક્ષ તરીકે શેર કરી છે. અગાઉ, દેશના ઉપરાષ્ટ્રપતિ ડેલ્સી રોડ્રિગ્ઝને વેનેઝુએલાના વચગાળાના રાષ્ટ્રપતિ તરીકે નિયુક્ત કરવામાં આવ્યા હતા.
ટ્રમ્પે રવિવારે સોશિયલ મીડિયા પ્લેટફોર્મ ટ્રુથ પર પોતાની આ તસવીર શેર કરી હતી. આ તસવીરમાં વિકિપીડિયાનું ઓફિશિયલ પેજ એડિટ કરવામાં આવ્યું છે, જેમાં ડોનાલ્ડ ટ્રમ્પને જાન્યુઆરી 2026માં વેનેઝુએલાના વર્તમાન રાષ્ટ્રપતિ તરીકે દર્શાવવામાં આવ્યા છે. ટ્રમ્પે આ પોસ્ટ શેર કરતાની સાથે જ તે વાયરલ થવા લાગી જ્યાં લોકો ટ્રમ્પના ઈરાદા પર સવાલ ઉઠાવી રહ્યા છે.
નોંધનીય છે કે 3 જાન્યુઆરીએ અમેરિકાએ એક મોટું સૈન્ય ઓપરેશન શરૂ કર્યું હતું અને વેનેઝુએલાના રાષ્ટ્રપતિ નિકોલસ માદુરો અને તેમની પત્ની સેલિયા ફ્લોરેસની રાષ્ટ્રપતિ સંકુલમાંથી જ ધરપકડ કરી હતી. બંનેને અમેરિકા લઈ જઈને કાર્યવાહી કરવામાં આવી રહી છે. આ દરમિયાન ડેલ્સી રોડ્રિગ્ઝે વેનેઝુએલાના રાષ્ટ્રપતિની જવાબદારી સંભાળી છે. જો કે, ટ્રમ્પે અગાઉ કહ્યું હતું કે જ્યાં સુધી “સલામત, ન્યાયી અને સમજદાર સંક્રમણ” સુનિશ્ચિત ન થાય ત્યાં સુધી યુએસ વેનેઝુએલા પર શાસન કરવાનું ચાલુ રાખશે.
