અમેરિકાના રાષ્ટ્રપતિ ડોનાલ્ડ ટ્રમ્પે મંગળવારે જ્યારે અમેરિકા અને ઈરાન વચ્ચે સમજૂતીને લઈને વાતચીતનો સંકેત આપ્યો ત્યારે 25 દિવસથી ચાલી રહેલા આ ભયાનક યુદ્ધના અંત માટે કેટલીક આશાઓ જાગી હતી. જોકે, હવે ઈરાને સ્પષ્ટ કર્યું છે કે તે સમાધાનના મૂડમાં નથી. ઈરાને માત્ર અમેરિકા સાથે વાતચીત કરવાનો ઈન્કાર જ નથી કર્યો પરંતુ ટ્રમ્પના દાવાઓની ખુલ્લેઆમ મજાક પણ ઉડાવી છે. બુધવારે IRGCના પ્રવક્તાએ અમેરિકા પર નિશાન સાધ્યું અને કહ્યું કે અમેરિકાએ તેની હારને સમજૂતી ન ગણવી જોઈએ.
ઇસ્લામિક રિવોલ્યુશનરી ગાર્ડ કોર્પ્સના ખાતમ અલ-અંબિયા સેન્ટ્રલ હેડક્વાર્ટરના પ્રવક્તાએ યુ.એસ.ને ચેતવણી આપી હતી કે યુદ્ધના વિકાસને રાજદ્વારી સફળતા તરીકે રજૂ ન કરે. ઈરાનના પ્રવક્તાએ કહ્યું કે અમેરિકા આ ક્ષેત્રમાં તેની પાછલી વ્યૂહાત્મક અને આર્થિક સ્થિતિ પાછી મેળવી શકશે નહીં.
IRGCના પ્રવક્તાએ એક નિવેદનમાં જણાવ્યું હતું કે, “આ સેક્ટરમાં તમારા રોકાણની કોઈ નિશાની જોવા મળશે નહીં, ન તો તમે ઉર્જા અને તેલના અગાઉના ભાવો ફરી ક્યારેય જોશો.” ઈરાનના પ્રવક્તાએ ટ્રમ્પના દાવાઓ પર વધુ કટાક્ષ કર્યો અને કહ્યું, “શું તમારા આંતરિક મતભેદો એટલી હદે પહોંચી ગયા છે કે તમે તમારી જાત સાથે વાત કરી રહ્યા છો?” પહેલા દિવસથી અમારું પ્રથમ અને છેલ્લું નિવેદન આ રહ્યું છે અને હંમેશા રહેશે: અમારા જેવા લોકો તમારા જેવા લોકો સાથે ક્યારેય સમાધાન નહીં કરે. અત્યારે નહીં, ક્યારેય નહીં.”
ઈરાનના પ્રવક્તાએ કહ્યું, “તમે જે વ્યૂહાત્મક તાકાતની વાત કરતા હતા તે હવે વ્યૂહાત્મક નિષ્ફળતામાં ફેરવાઈ ગઈ છે.” તેમણે કહ્યું, “જો તે દેશ માટે શક્ય હોત જે પોતાને વૈશ્વિક મહાસત્તા કહે છે, તો તે અત્યાર સુધીમાં આ સંકટમાંથી બહાર આવી ગયો હોત.” તમારી હારને સમાધાન ન કહો. તમારો ખાલી વચનોનો યુગ હવે પૂરો થઈ ગયો છે.
