ઈરાનમાં ચાલી રહેલા યુદ્ધ વચ્ચે ઈઝરાયેલે ઈસ્ટર્ન લેબનોનની અંદર એક ઓપરેશન હાથ ધર્યું છે, જેની સમગ્ર વિસ્તારમાં ચર્ચા થઈ રહી છે. ઈરાનની સાથે લેબનોન પર સતત બોમ્બમારો કરી રહેલી ઈઝરાયેલની સેનાએ શુક્રવારે રાત્રે પોતાના એક વિશેષ એકમ સાથે સ્થાનિક કબ્રસ્તાન પર હુમલો કર્યો હતો. યુનિટનું લક્ષ્ય 40 વર્ષ પહેલાં ગુમ થયેલા ઇઝરાયેલી ફાઇટર પાઇલટ રોન અરાદના અવશેષો શોધવાનું હતું.
ટાઈમ્સ ઓફ ઈઝરાયેલના અહેવાલ મુજબ, હિઝબુલ્લાહ લડવૈયાઓના કેટલાક પ્રતિકાર છતાં ઈઝરાયલી દળોએ શુક્રવારે રાત્રે આ મિશન પાર પાડ્યું હતું. અધિકારીઓએ પુષ્ટિ કરી કે ઓપરેશન અરાદના અવશેષો શોધવાનું હતું. જોકે, તેઓને અરાદના અવશેષો મળ્યા ન હતા. સેનાએ સંકેત આપ્યો કે તે અરાદના અવશેષોની શોધ ચાલુ રાખશે.
રિપોર્ટ અનુસાર, ઇઝરાયેલી સેનાનું આ ઓપરેશન લેબનોનની બેકા વેલીના નાબિશિત ગામમાં થયું હતું. સ્થાનિક લોકોના જણાવ્યા અનુસાર, ઇઝરાયલી કમાન્ડો ચાર હેલિકોપ્ટરમાં કબ્રસ્તાનની બહાર ઉતર્યા અને કબર ખોદવાનું શરૂ કર્યું. ત્યાં સતત થોડો સમય કામ કર્યા બાદ ઇઝરાયલી સૈનિકો ત્યાંથી પાછા ફર્યા. એક સ્થાનિક રિપોર્ટરના જણાવ્યા અનુસાર, લોકોનું માનવું છે કે અરાદના મૃત્યુ પછી તેને અહીં ક્યાંક દફનાવવામાં આવ્યો હતો. આ ઘટનાના 40 વર્ષ બાદ પણ ઈઝરાયેલ તેના ફાઈટર પાઈલટના મૃતદેહને શોધી રહ્યું છે.
