ઈંગ્લેન્ડના ટેસ્ટ કેપ્ટન બેન સ્ટોક્સની જમણી આંખની સર્જરી કરવામાં આવી છે જે સફળ રહી છે. તેના ચહેરા પર બોલ વાગ્યો હતો જેના કારણે તેની આંખમાં ઈજા થઈ હતી. 34 વર્ષીય ઓલરાઉન્ડરે ગયા અઠવાડિયે તેની ઈન્સ્ટાગ્રામ સ્ટોરીમાં એક તસવીર પોસ્ટ કરી હતી જેમાં તેની આંખ ખરાબ રીતે સૂજી ગઈ હતી. તેના ગાલ અને હોઠ પર ઉઝરડા હતા અને નાક પર પટ્ટી બાંધવામાં આવી હતી.
તસવીરની સાથે સ્ટોક્સે હસતા ચહેરાના ઈમોજી સાથે લખ્યું, ‘તમારે ક્રિકેટ બોલની હાલત જોવી જોઈએ.’
મંગળવારે તેણે હોસ્પિટલનો બીજો ફોટો પોસ્ટ કર્યો. તેમાં પણ તેનો ચહેરો સૂજી ગયો હતો અને કેપ્શનમાં તેણે લખ્યું હતું કે, ‘એવું લાગતું નથી પણ સર્જરી સફળ રહી છે.’
ઓસ્ટ્રેલિયા પ્રવાસ પરથી પરત ફર્યા બાદ બેન સ્ટોક્સ હાલમાં ઈંગ્લેન્ડમાં છે. તેની ટીમને એશિઝમાં 4-1થી કારમી હારનો સામનો કરવો પડ્યો હતો. જે બાદ તેની કેપ્ટનશિપ પર પણ સવાલો ઉઠવા લાગ્યા હતા. જોકે, સ્ટોક્સે સ્પષ્ટ કર્યું છે કે તે ટેસ્ટમાં ટીમની કેપ્ટનશિપ ચાલુ રાખવા માંગે છે. તેની કેપ્ટનશીપ સાચવવામાં આવશે કે છીનવી લેવામાં આવશે તે અંગેનો નિર્ણય ECB સમીક્ષા બાદ આવશે.
