ભારતીય T20 ટીમમાં જગ્યા ન બનાવી શકનાર મોહમ્મદ સિરાજ હાલમાં ઘરેલુ ક્રિકેટમાં પરસેવો પાડી રહ્યો છે. શુક્રવારે, 12 ડિસેમ્બરે, મોહમ્મદ સિરાજ સૈયદ મુશ્તાક અલી ટ્રોફીમાં મુંબઈ સામેની મેચમાં હૈદરાબાદ તરફથી રમ્યો હતો. આ મેચમાં ત્રણ વિકેટ લઈને તેણે હૈદરાબાદની જીતમાં મહત્વની ભૂમિકા ભજવી હતી અને પસંદગીકારોનું ધ્યાન ખેંચ્યું હતું. સિરાજે આ મેચમાં 3.5 ઓવર નાંખી જેમાં તેણે માત્ર 17 રન આપ્યા અને 3 વિકેટ લીધી. આ શાનદાર પ્રદર્શન માટે તેને ‘પ્લેયર ઓફ ધ મેચ’નો એવોર્ડ આપવામાં આવ્યો હતો. આ એવોર્ડ લેવા આવેલા મોહમ્મદ સિરાજે કંઈક એવું કર્યું કે બધા તેને સલામ કરી રહ્યા છે.
મોહમ્મદ સિરાજની ઘાતક બોલિંગના આધારે હૈદરાબાદની ટીમ મુંબઈને 131ના સ્કોર પર હરાવવામાં સફળ રહી હતી. હૈદરાબાદે આ સ્કોરનો પીછો 11.5 ઓવરમાં 9 વિકેટે કરી લીધો હતો. હૈદરાબાદના આ ચેઝનો હીરો તન્મય અગ્રવાલ હતો, જેણે એકલા હાથે 40 બોલમાં 7 ચોગ્ગા અને 4 ગગનચુંબી છગ્ગાની મદદથી 75 રનની ઇનિંગ રમી હતી.
મોહમ્મદ સિરાજે આ મેચનો ટોન સેટ કર્યો હતો, જેના કારણે તેને પ્લેયર ઓફ ધ મેચનો એવોર્ડ આપવામાં આવ્યો હતો. જ્યારે તન્મય 75 રનની ઇનિંગ રમવા છતાં ખાલી હાથે રહ્યો હતો.
પરંતુ આ અવસર પર મોહમ્મદ સિરાજે ખેલદિલી બતાવી અને સિનિયર ખેલાડી હોવાને કારણે તેણે સાથી ખેલાડી તન્મય અગ્રવાલ સાથે પ્લેયર ઓફ ધ મેચનો એવોર્ડ શેર કર્યો. સિરાજના આ ઈશારે તન્મયનું મનોબળ ઘણું વધાર્યું હશે.
