ઓસ્ટ્રેલિયાના ટેસ્ટ કેપ્ટન પેટ કમિન્સે ઉસ્માન ખ્વાજાના વખાણ કર્યા છે. તેણે કહ્યું કે ખ્વાજાનું કરિયર અતુલ્ય રહ્યું છે. 39 વર્ષના ઉસ્માન ખ્વાજાએ ટેસ્ટ ક્રિકેટમાંથી સંન્યાસ લેવાની જાહેરાત કરી છે. તેણે કહ્યું કે વર્તમાન એશિઝ શ્રેણીની પાંચમી અને છેલ્લી મેચ તેની કારકિર્દીની છેલ્લી મેચ હશે. 4 જાન્યુઆરીથી સિડનીમાં શરૂ થનારી ટેસ્ટમાં તે છેલ્લી વખત સફેદ જર્સીમાં રમતા જોવા મળશે.
ઉસ્માન ખ્વાજાએ તેની છેલ્લી ટેસ્ટ મેચ પહેલા કુલ 87 ટેસ્ટ રમી હતી. જેમાં તેણે 43.39ની એવરેજથી 6,206 રન બનાવ્યા છે. આ સમયગાળા દરમિયાન તેણે 157 ઇનિંગ્સ રમી અને 16 સદી અને 28 અડધી સદી ફટકારી. ખ્વાજાએ શુક્રવારે 50 મિનિટ લાંબી પ્રેસ કોન્ફરન્સમાં નિવૃત્તિની જાહેરાત કરી હતી. આ દરમિયાન તેણે પોતાની કારકિર્દી દરમિયાન જે રંગભેદનો સામનો કર્યો તેનો પણ ઉલ્લેખ કર્યો.
પેટ કમિન્સે ઉસ્માન ખ્વાજાને તેની શાનદાર કારકિર્દી બદલ અભિનંદન પાઠવ્યા છે અને તેના હોમ ગ્રાઉન્ડ પર છેલ્લી વખત તેની પાસેથી બીજી શાનદાર ઇનિંગ્સની આશા વ્યક્ત કરી છે.
ભૂતપૂર્વ ભારતીય ક્રિકેટર શિખર ધવને પણ ખ્વાજાને સિડનીમાં રમાનારી તેની છેલ્લી ટેસ્ટ માટે શુભેચ્છા પાઠવી છે. તેણે X પર લખ્યું, ‘કેટલી શાનદાર સફર રહી, ઉસ્માન ખ્વાજા. સિડનીમાં છેલ્લી ટેસ્ટ માટે અને આવનારા સમય માટે સર્વશ્રેષ્ઠ.
