ચીનમાંથી એક દુઃખદ સમાચાર સામે આવ્યા છે. હુબેઈ પ્રાંતના જિયાંગયાંગ શહેરમાં ફટાકડાની દુકાનમાં થયેલા વિસ્ફોટમાં 12 લોકોના મોત થયા છે. આ ઘટના ચંદ્ર નવા વર્ષની ઉજવણી દરમિયાન બની હતી અને થોડા દિવસોમાં દેશમાં આ પ્રકારનો બીજો વિસ્ફોટ છે. સિન્હુઆ ન્યૂઝ એજન્સીના જણાવ્યા અનુસાર, હુબેઈ પ્રાંતના જિઆંગયાંગ શહેરના ઝેંગજી ટાઉનમાં ફટાકડાની દુકાનમાં બુધવારે સ્થાનિક સમયાનુસાર બપોરે 2 વાગ્યે વિસ્ફોટ થયો હતો.
અહેવાલો અનુસાર, વિસ્ફોટથી લગભગ 50 ચોરસ મીટરના વિસ્તારને અસર થઈ હતી અને આગ લાગી હતી. ઇમરજન્સી સેવાઓને તાત્કાલિક ઘટનાસ્થળે રવાના કરવામાં આવી હતી અને સ્થાનિક સમય અનુસાર બપોરે 3:30 વાગ્યે આગ પર કાબૂ મેળવી લેવામાં આવ્યો હતો. ઘટના સ્થળેથી 12 મૃતદેહો મળી આવ્યા છે. વિસ્ફોટનું ચોક્કસ કારણ હજુ સ્પષ્ટ થયું નથી અને તેની તપાસ ચાલુ છે.
