બેંગલુરુ: બેંગલુરુ મ્યુનિસિપલ કોર્પોરેશન (ગ્રેટર બેંગલુરુ ઓથોરિટી – GBA) અને બેંગલુરુ સોલિડ વેસ્ટ મેનેજમેન્ટ લિમિટેડ (BSWML) એ શહેરને સ્વચ્છ બનાવવા માટે એક અનોખી પહેલ શરૂ કરી છે. આ પહેલ હેઠળ હવે સામાન્ય નાગરિકોને રસ્તા પર કચરો ફેંકતા લોકોના વીડિયો કે ફોટા શેર કરવા માટે 250 રૂપિયાનું ઈનામ આપવામાં આવશે.
શહેરમાં વધતા જતા કચરાની સમસ્યાને પહોંચી વળવા અને નાગરિકોમાં સ્વચ્છતા પ્રત્યે જવાબદારીની ભાવના પેદા કરવાના હેતુથી આ યોજના શરૂ કરવામાં આવી છે. અધિકારીઓ આશા રાખી રહ્યા છે કે આ પગલાથી લોકો માત્ર પોતે જ સ્વચ્છતાની કાળજી લેશે નહીં, પરંતુ અન્ય લોકોને પણ તે માટે પ્રેરણા આપશે.
ઈનામ કેવી રીતે મેળવવું?
BSWMLએ જણાવ્યું હતું કે નાગરિકો રસ્તાઓ અથવા જાહેર સ્થળો પર કચરો ફેંકતા લોકોના વીડિયો અથવા ફોટા બનાવી શકે છે અને તેને નિયુક્ત વોટ્સએપ નંબર અથવા સત્તાવાર સોશિયલ મીડિયા ચેનલો દ્વારા મોકલી શકે છે. સત્તાવાળાઓ દ્વારા વિડિયોની તપાસ કરવામાં આવશે અને જો વિડિયોમાં નિયમ ભંગની ઘટના સ્પષ્ટપણે જોવા મળશે તો વીડિયો મોકલનાર નાગરિકને 250 રૂપિયાનું ઈનામ આપવામાં આવશે.
BSWMLના ચીફ એક્ઝિક્યુટિવ ઓફિસર (CEO) કારી ગૌડાએ NDTVને જણાવ્યું કે અમારી પાસે લગભગ 5,000 ઓટો છે જે દરરોજ ઘરે-ઘરે જઈને સૂકો અને ભીનો કચરો એકત્ર કરે છે. તેમ છતાં કેટલાક લોકો રસ્તા પર કચરો ફેંકે છે. આ પુરસ્કાર યોજનાનો ઉદ્દેશ્ય લોકોના વર્તનમાં પરિવર્તન લાવવાનો છે.
જાગૃતિ સાથે કડકતા
અધિકારીઓ કહે છે કે આ પુરસ્કાર યોજના માત્ર નાગરિકોને પ્રોત્સાહિત કરવા માટે નથી, પરંતુ તે “જાગૃતિ વધારવાનો એક લાભદાયી માર્ગ” છે. તાજેતરમાં જ બેંગલુરુ પ્રશાસને તે લોકો સામે કાર્યવાહી શરૂ કરી છે જેઓ વારંવાર જાહેર સ્થળો પર કચરો ફેંકે છે. ઘણા કિસ્સાઓમાં, મહાનગરપાલિકા કચરો ઉપાડીને તે જ વ્યક્તિના ઘરની બહાર પાછી મૂકી દે છે, જેથી તેમને તેમની ભૂલનો અહેસાસ થાય.
આ નવી પહેલ વડાપ્રધાનના સ્વચ્છ ભારત અભિયાનની ભાવના સાથે મેળ ખાય છે, જેમાં નાગરિકોની સક્રિય ભાગીદારી સૌથી મહત્વપૂર્ણ માનવામાં આવે છે. અધિકારીઓને આશા છે કે નાગરિકોના સહકારથી, બેંગલુરુને “કચરો મુક્ત” શહેર બનાવવાનું લક્ષ્ય ટૂંક સમયમાં પ્રાપ્ત કરી શકાશે.
