શું સમાચાર છે?
કર્ણાટક ની રાજધાની બેંગલુરુ મ્યુનિસિપલ કોર્પોરેશનની ચૂંટણી ઈલેક્ટ્રોનિક વોટિંગ મશીન (EVM)ના બદલે બેલેટ પેપરથી કરાવવાનો નિર્ણય લેવામાં આવ્યો છે. કર્ણાટકના મુખ્ય ચૂંટણી કમિશનર જીએસ સંઘ્રેશીએ સોમવારે એક પ્રેસ કોન્ફરન્સમાં આ જાહેરાત કરી હતી. તેમણે કહ્યું કે ગ્રેટર બેંગલુરુ ઓથોરિટી (GBA) માટેની મ્યુનિસિપલ ચૂંટણી 25 મે પછી યોજાશે અને EVM ને બદલે બેલેટ પેપરનો ઉપયોગ કરવામાં આવશે. તમને જણાવી દઈએ કે 2015ની કોર્પોરેશન ચૂંટણી ઈવીએમનો ઉપયોગ કરીને યોજાઈ હતી.
રાજ્ય ચૂંટણી કમિશનરે શું કહ્યું?
સંઘ્રેશીએ જણાવ્યું હતું કે જીબીએ હેઠળ 5 મ્યુનિસિપલ કોર્પોરેશન છે, જેની ચૂંટણી બેલેટ પેપર દ્વારા યોજાશે. પત્રકાર પરિષદમાં સંઘ્રેશી ઉપરાંત તમામ 5 કોર્પોરેશન કમિશનરો હાજર રહ્યા હતા. કમિશનરે કહ્યું કે તે એક સ્વતંત્ર બંધારણીય સંસ્થા છે અને બેલેટ પેપરનો ઉપયોગ કરવાનો નિર્ણય તેનો પોતાનો છે. તેમણે કહ્યું કે ઈ.વી.એમ અને મતપત્રોમાં કોઈ ખામીઓ નથી, અને સુપ્રીમ કોર્ટે મતપત્રના ઉપયોગ પર પ્રતિબંધ મૂક્યો નથી. પંચે કહ્યું કે પંચાયતની ચૂંટણી બેલેટ પેપરથી થાય છે.
ગ્રેટર બેંગલુરુમાં 88.91 લાખ મતદારો
ચૂંટણી અધિકારીઓએ જણાવ્યું કે, ગ્રેટર બેંગલુરુ ક્ષેત્ર માટે ડ્રાફ્ટ મતદાર યાદી સોમવારે સત્તાવાર રીતે પ્રકાશિત કરવામાં આવી છે. ડ્રાફ્ટ ડેટા અનુસાર, ગ્રેટર બેંગલુરુમાં કુલ 88,91,411 મતદારો છે, જેમાં 45,69,193 પુરૂષો, 43,20,583 મહિલાઓ અને 1,635 ‘અન્ય’ શ્રેણીના મતદારોનો સમાવેશ થાય છે. ડ્રાફ્ટ લિસ્ટ પર વાંધો દાખલ કરવાનો સમયગાળો 3 ફેબ્રુઆરી સુધી ખુલ્લો રહેશે. મતદારો બૂથ લેવલ ઓફિસર (BLO)નો સંપર્ક કરી શકે છે. આખરી મતદાર યાદી 16 માર્ચે પ્રસિદ્ધ કરવામાં આવશે.
