પ્રખ્યાત ક્રિકેટ કોમેન્ટેટર હર્ષ ભોગલેએ વર્ષ 2025 માટે તેમની શ્રેષ્ઠ ODI ટીમ (ODI XI) ની જાહેરાત કરી છે. ભોગલેએ શરૂઆતમાં સ્પષ્ટ કર્યું હતું કે ફ્રેન્ચાઇઝી ક્રિકેટના વધતા પ્રભાવ અને આંતરરાષ્ટ્રીય સ્તરે મોટા ખેલાડીઓની અનિયમિત ભાગીદારીને કારણે તેણે T20 ટીમની પસંદગી કરી નથી. તેણે ODI ફોર્મેટને પ્રાધાન્ય આપ્યું, જોકે સ્વીકાર્યું કે આ વર્ષે બહુ ઓછી ODI મેચો રમાઈ હતી, જેના કારણે ટીમની પસંદગી મુશ્કેલ બની હતી.
હર્ષા ભોગલેએ પોતાની ટીમમાં ઓપનિંગ બેટ્સમેન તરીકે રોહિત શર્મા સાથે શાઈ હોપની પસંદગી કરી છે. રોહિતે આ વર્ષે 50 ની સરેરાશ અને 100 ની સ્ટ્રાઈક રેટથી 650 રન બનાવ્યા છે. ભારત માટે આ વર્ષે ODI ક્રિકેટમાં સૌથી વધુ રન બનાવનારા બેટ્સમેનોની યાદીમાં તે વિરાટ પછી બીજા ક્રમે છે. હર્ષે મોહમ્મદ રિઝવાન કરતાં શાઈ હોપને વિકેટકીપર તરીકે સામેલ કર્યો છે, જેણે લગભગ 56ની એવરેજથી 670 રન બનાવ્યા હતા.
હર્ષા ભોગલેએ કોઈપણ ખચકાટ વિના વિરાટ કોહલીને આ વર્ષની સર્વશ્રેષ્ઠ ODI ટીમમાં ત્રીજા નંબરે રાખ્યો છે. વિરાટ કોહલીએ આ વર્ષે શાનદાર પ્રદર્શન કર્યું છે અને 65ની એવરેજથી 651 રન બનાવ્યા છે. કિંગ કોહલી 2025માં ભારત માટે સૌથી વધુ રન બનાવનાર બેટ્સમેન છે. હર્ષે આ વર્ષે ODI ક્રિકેટમાં શાનદાર ફોર્મમાં રહેલા ઈંગ્લેન્ડના જો રૂટને ચોથા સ્થાને રાખ્યો છે. જો રૂટ વર્ષ 2025માં સમગ્ર વિશ્વમાં ODI ક્રિકેટમાં સૌથી વધુ રન બનાવનાર બેટ્સમેન છે. આ વર્ષે તેણે 15 મેચમાં સૌથી વધુ 808 રન બનાવ્યા છે. દક્ષિણ આફ્રિકાના મેથ્યુ બ્રિટ્ઝકે (સરેરાશ 64) અને ન્યુઝીલેન્ડના ડેરીલ મિશેલ (761 રન, સરેરાશ 54)ને મિડલ ઓર્ડરમાં સ્થાન મળ્યું છે, જે ટીમને સ્થિરતા અને આક્રમકતા બંને પ્રદાન કરે છે. મિશેલ સેન્ટનર ઓલરાઉન્ડર તરીકે 7માં નંબર પર છે, જેણે 17 મેચમાં 25 વિકેટ લેવાની સાથે બેટિંગમાં પણ ઉપયોગી યોગદાન આપ્યું છે.
બોલિંગ વિભાગમાં હર્ષે વિકેટ લેનારા ખેલાડીઓ પર વિશ્વાસ વ્યક્ત કર્યો છે. ફાસ્ટ બોલિંગની કમાન મેટ હેનરી (31 વિકેટ), જોફ્રા આર્ચર (18 વિકેટ) અને વેસ્ટ ઈન્ડિઝના જેડન સીલ્સ (27 વિકેટ)ના હાથમાં છે. સીલ્સે આ વર્ષે ઉત્તમ સ્ટ્રાઈક રેટ જાળવી રાખ્યો છે, દર ત્રણ ઓવરમાં એક વિકેટ લીધી છે. કુલદીપ યાદવને સ્પેશિયાલિસ્ટ સ્પિનર તરીકે ટીમમાં જગ્યા મળી છે, જેણે 11 મેચમાં 19 વિકેટ ઝડપી છે.
ભોગલેએ અંતમાં કહ્યું કે આ ‘શ્રેષ્ઠ ખેલાડીઓ’ની યાદી નથી પરંતુ આ વર્ષના ‘શ્રેષ્ઠ પ્રદર્શન’ પર આધારિત ટીમ છે, જેના કારણે બુમરાહ અને ટ્રેવિસ હેડ જેવા મોટા નામોને તેમાં સામેલ કરી શકાયા નથી કારણ કે તેઓએ પૂરતું ક્રિકેટ રમ્યું નથી.
